Jinghpaw mung, Hugawng Pa hta pru ai Pat nhprang gaw, mungkan hta manu dan dik ai nhprang sut rai langai rai nga ai re. Ndai Pat nhprang gaw, lai wa sai prat ban shaning law law kaw na, hkrung kanu ni kaw na byin pru wa ai nhprang langai mung rai nga ai.
Pat nhprang (Amber) ngu ai hpe Jinghpaw Mung Sinna Dingdung Hugawng Pa mayan pru ai nhprang sut rai langai rai nga ai.
Hugawng Lido lam nmaw kaba gaw, Mungdan kaba lahkawng hpe matut da ai ahkyak ai, mungkan hta mying dan hkung nga ai re.
Hugawng Pa hta Pat nhprang hpe 2005 ning daram kaw na mu hpang wa ai kaw na, Miwa gat lawk de du mat ai hpang kaw na, 2010 ning hkan kaw na htu hpang wa ai re lam chye lu ai.
Pat Htu shaw ai ladat
Pat nlung htu shaw ai lam gaw, kaga ja lungseng ni htu ai zawn rai na jak kaba the htu ai n re sha, dawng 4 grup yin nhkun kasha htu na kata de htu shang mat ai re lam chye lu ai.
Kata de htu shang mat ai ten, Jak kaji ni the nbung jak kaji ni lang na kata de htu krau shaw ai masa lam the seng na Pat maw kaw bungli galaw ai mung shawa La langai KNG de n dai zawn tsun dan ai re.
“lay pay chyin nhkun kasha htu rai na, kata de sung mat wa jang, wan jak kasha hte wan shachyi da rai, ga htu ai gaw gan jak hpai na shang htu mat ai, dai kaw sung yang sung ai hku, n kau sung ai ni gaw, Pe 360 ram gaw sung dik rai nga ai,” nga tsun dan ai re.
2017 Myen Hpyendap rai n du shi ai shawng daw na masa lam
Hugawng pa, Pat maw ginra de nnan daw masha tsa lam sha galaw lu, galaw sha hpang wa ai rai tim, 2013 ning daram kaw na masha sen lam pru shang galaw sha wa ai re lam chye lu ai.
Dai ten Pat maw hta Pat nhkun 1500 daram nga lai wa ai lam chye lu ai re. Miwa hpaga hpung ni mung Pat nhprang hpe kashun kashe jawm mari ai majaw, lani mi sa dut yang lani mi ma ai masa re lam chye lu ai.
2013 ning hkan na gat lawk masa the seng na, n tsa na salang wa ndai zawn matut tsun dan da ai re.
“ Miwa ni Pat mari ai lam the seng na mung, lai sai ten na hte ya ten na gat lawk masa lam hpe gara hku mung shingdaw n mai mat ai, gat lawk mung hten mat, Miwa ni mari ai lam mung yawm mat. Dai majaw Pat galaw ai ni law malawng ja htu ai maga de bai man yawng mat na, n kau gaw, dum n ta de yi sun bai wa galaw sha mat ai ni mung law law re,” nga tsun ai re.
2013 ning hkan gaw, Pat hpaga galaw ai ni hpe Miwa lauban ni nan hotel shap da ya rai, dai shara kaw la sa ai hte kalang ta jawm gashun mari dut kau wa ai lam matut tsun dan da ai re.
Pat Maw Ginra Majan Hte Gat Lawk
Hugawng pa, Pat Maw ginra hpe Myen hpyen dap gasat zing madu kau na matu 2017 June shata praw 5 ya shani Helicopter nbungli n tsa na laika jahkrat nna, Pat maw kaw nga ai mung shawa yawng n htoi bat lahkawng laman maw kata na yawng pru na matu sadi jaw n dau laika pa hkying lam jahkrat mat ai re.
Dai zawn sadi jaw laika jahkrat shabra ngut ai hpang 2017 June 15 ya shani kaw na Hugawng pa Pat maw ginra hpe hpyen n gun kaba hte htim gasat wa ai re. 2017 ning November hte December shata daram hkan hta Myen hpyen nbungli bawm laja lana jahkrat bun na mung shawa si hkala lam ni law wa ai re.
Myen Hpyendap maga hpyen n-gun laknak n gun kaba, nbungli jai lang nna, Pat maw ginra hpe shata 6 laman htim gasat zing madu kau wa ai re. Myen Hpyendap pat maw hpe htim gasat ai ten, mungshawa hkying lam hpe hpyen ninggang shatai woi da ai lam ni byin lai wa sai hpe, KNG nan 2018 hta Danai mung shawa ni hte wa hkrum shaga ai kaw nna chye lu ai re.
Dai hpang kaw nna Pat hpaga ga ai lam ni gau ngwi ngwi yawm mat wa ai, ya 8 ning ram hta Pat hpaga galaw ai masha marai 10 kaw na marai 1 ram sha ngam mat sai lam the seng na Pat hpaga la wa n dai zawn tsun dan da ai re.
“2017-2018 kaw na Pat nhprang hpaga ga ai ni gau ngwi ngwi yawm mat wa ai ya nga yang 8 ning du sai Pat hpaga n byin ai, lai sai 2011 the 2016 lapran hkan nga yang, Pat sa dut ai masha marai 1 du ai hte miwa ni marai 30, 40 ram hkan kashun mari lai wa sai,” nga tsun ai re.
2021 ning Myen Hpyen dap daru magam zing kau ai hpang Pat maw ginra ni hpe Wunpawng Mungdan Shanglawt Hpyendap KIA maga 2024 ning May shata hta bai gasat zing madu la lu wa ai rai nga ai.
Pat Maw hpe KIA bai htim gasat zing madu la lu wa ai hpang, Pat nhprang htu shaw ai lam loi li bai nga wa ai rai tim, Miwa mung maga na mari ai lam yawm mat ai majaw, gat lawk n nga na, shawoi na zawn galaw ai yawm mat ai hpe chye lu ai.
KIA gasat zing da ai Pat maw maga de Myen Hpyen dap hte Warazup Pyithutsit dap ni kaw na 2025 December 13 ya shani nbungli the wa gap na Pyithutsit ni hpe lagaw lam hku htim gasat shangun na Pat maw na ahkyak ai Hkalawng kawng hpe bai yen kau da ai lam chye lu ai.
Pat maw n hpaw mat sai.
Myen Hpyen dap the Pyithutsit dap ni Hka Lawng kawng hpe wa htim gasat zing kau ai hpang, KIA maga Pat maw hpe tsep kawp pat kau ai gaw, dai ni ten du hkra rai nga ai. December 13 ya shani kaw na Patmaw pat mat ai majaw, kadai mung pru shang n mai galaw ai lam chye lu ai re.
Ya na zawn Pat maw, pat mat ai majaw pat galaw ai mung shawa n kau ja htu bungli galai mat ai ni nga ai zawn, nkau tinang mare buga de wa na, hkauhting hkauna wa galaw sha mat ai ni mung law law re lam chye lu ai.
Pat maw n hpaw mat ai kaw na Pat nhprang hpaga galaw ai ni a lam the seng nna, pat hpaga num langai KNG de n dai zawn tsun dan ai re.
“Pat hpaga galaw ai ni, masa n htuk ai, bungli n byin ai, dai majaw, Mogok na ni nga yang mung Mogok de wa na, tinang chye ai bungli wa galaw sha mat, ndai makau grup yin hkan na manang ni nga yang mung Wa rem ai ni rem, rem lu rem sha nan ga mat ai she law sai,” nga tsun dan wa ai re.
Myitkyina kaw Pat Gat lawk n nga sai
Myitkyina kaw Pat nhprang arung arai ni lai sai ten na Pat ni loi li naw ngam ai raitim, dut mari ai lam hta grai yawm mat sai nga pat hpaga galaw ai ni tsun ai re.
Myitkyina Jakwang lawk na Sut nhprang gat wang hta, shawoi Pat dut ai seng hkan Lungseng dut ai ni mahtang shara la ma sai lam chye lu ai.
Myitkyina Jakwang Lawk (စက်မှုဇုံ) kaw hpaw da ai, Sut Nhprang Gat lawk hta Pat dut ai ni loi li naw nga ai rai tim, mari ai ni n nga mat ai majaw, Pat gat lawk tsep kawp n nga mat sai lam chye lu ai.
Myitkyina gat lawk kaw gaw Pat nlung shatsawm ai sa ap ai ni tsep kawp n nga mat ai daram rai sai lam, Pat nlung shatsawm garan ai Salang langai mung KNG de n dai zawn tsun dan wa ai re.
“Anhte gaw Payin ap ai masha n nga mat ai majaw, anhte gaw Lungseng Papu she galaw mat sai, anhte gaw Payin shatsawm garan ai ni re nga yang, sa ap ai ni n nga mat ai daram rai mat sai, shawoi na zawn kaji kajaw sa galaw shangun ai ni pyi n nga mat sai,” nga tsun dan ai re.
Ya ten na Myitkyina gat lawk masa gaw, Payin nhprang dut mari ai lam hta Nhprang (ကုန်ကြမ်း) gaw hpu nna, nga taw ai Payin ni hpe mung n lu dut re lam ni byin taw nga ai nga matut tsun dan wa ai re.
Pat hpaga galaw ai mung shawa ni gaw, Pat maw hpe bai hpaw na matu la dingda taw ai rai tim, mung masa mayak ai majaw, mai byin ai bungli ni tam galaw na asak matut taw ai masa re nga, Pat galaw ai nit sun ai re.
Ya ten na masa hta, Pat maw hpaw tim, Miwa mung pru shang hkrun lam sha n hpaw dingsa gaw, Pat nhprang gat lawk gaw naw yak na re nga, dai mung shawa ni matut tsun da ai re.
