Mungmyit Sinli Namtau Mare na Mung Shawa Lamu ga hpe Kokang MNDAA laknak lang hpung ni a mying dut sha nna, Miwa lauban langai sa kashun madu la taw nga ai lam ginra masha ni tsun dan wa ai re.
Lai wa sai February praw 5 ya shani Mung Shawa ni hkai da ai Kumshu sun na Palastic ni yawng hpe sa gun galang kau ya nna, Dai Miwa lauban shi lamu ga re nga zing madu la wa ai re nga, Ginra mung Shawa ni KNG Shiga de n dai zawn tsun dan wa ai re.
“Anhte Kumshe hkai da ai majaw, Palastic magap da ai hpe Kokang hpyi hpun ai Miwa lauban la wa gaw bai sa gun kau ya ya rai na, Manghkang byin ai lahkawng lang rai sai,” nga tsun dan ai re.
Dai lamu ga gaw, lai wa sai Asuya lakhtak ten, စီမံကိန်း shara re nga zing da ai kaw na, Asuya ni hpa bai n galaw byin mat ai majaw, lamu ga madu ni hpe bai ap ya sai lamu ga re hpe chye lu ai.
Ya zing hkrum ai Mung Shawa ni a lamu ga gaw, hting gaw kru na yawng pawng yang, Eka 10 daram nga ai lam chye lu ai.
Mung Shawa ni kaw na gaw, ya na zawn, laknak lang wuhpung ni a mying hpe dut sha nna, n tara ai hku Mung Shawa lamu ga hpe zing madu ai lam hpe tsep kawp n ra sharawng ai lam, lamu ga zing la hkrum ai amyu shayi langai mung KNG de n dai zawn matut tsun dan da ai re.
“Kokang hpyi hpun nna, n dai zawn n tara ai hku na mung shawa lamu ga hpe gashun mya la ai hpe gaw, anhte mung shawa ni tsep kawp n ra sharawng ga ai, gadai kaning re ai gumshem lailen hpe mung n ra sharawng ga ai,” nga tsun ai re.
