Myitkyina Hpungkyi Poi lamang langai hta, La langai Sinat gap sat hkrum wa ai lam garum kahtau hpung ni kaw na chye lu ai.
November 10 ya shana hkying 11 aten daram hta Myitkyina Yuzana lawk na gawng ngu hpara ထီးတင်ပွဲ galaw ai poi wang gat kata kaw, Mying n chye ai la langai gap sat hkrum wa ai rai nga ai.
Sinat gap sat hkrum ai la wa a Mying, nga shara ni hpe a tsawm tup hkrak n chye lu ai rai tim, dai la hpe maram yu yang asak 30 ning ram re ai La ngu maram lu ai rai nna, Baw Na pawt kaw gap hkrum ai majaw, dai shara hta nan asak si hkrum ai lam မျိုးဆက်သစ် garum kahtau hpung na lit nga ai Salang langai KNG shiga de ndai zawn tsun dan wa ai re.
“Yuzana Hpungkyi Jawng langai na ထီးတင်ပွဲ galaw ai poi wang gat kata kaw asak 30 ning ram re ai La langai, Na pawt kaw gap hkrum ai majaw, dai shara hta nan asak si mat ai,” nga မျိုးဆက်သစ် garum kahtau hpung na Salang langai tsun ai re.
Poi gat wang kata ya na zawn masha langai gap sat hkrum wa ai majaw, dai poi lamang sa ai mung shawa ni, kasu kabrawng byin na yawng hprawng bra ma ai hpang she, garum kahtau hpung ni du wa ai majaw, mabyin lawng lam yawng hpe a tsawm tup hkrak n chye kau dat ai nga tsun ai re.
Ya na zawn, Masha law law shawng kaw gap sat ai wa hpe dai ni du hkra n mu rim shi ai lam matut chye lu ai.
Myitkyina Njang Kawngl awk hta lai wa sai September 28 ya shana hkying 4 ram hta mung, ဆုတောင်းပြည့်ဘုရား lam kaw, asak 20 ning ram re ai amyu shayi langai n htu the galun sat hkrum da ai re.
Myitkyina muklum kata ya na zawn, masha sat hkrum ai lam ni jahkring hkring byin taw ai rai tim, lit la ya na masha n nga ginra masha ni myit tsang let hkrai hkawm sa taw ra ai re lam, ginra masha ni tsun ai re.
