Myen Hpyen Mawdaw Hkap Kapaw Hkrum ai Hpang Nbungli the Bai Wa Gap bun
Myen Hpyen Y12 Nbung li langai hte dai na maga de hkying 2 ram hta Hpakant Kahtang mare maga de Bawm 4 lang wa jahkrat bun kau da ai lam ginra masha ni kaw na chye lu ai.
Hpakant Mawsiza lam kaba n tsa Myen Hpyen Mawdaw hkap kapaw hkrum ai hpang, makau grup yin ni hkan na Mung Shawa ni hpe ladu lai san jep ai lam galaw wa ai sha n ga, Hotel kaw manam ai ni yawng hpe gawt shapraw kau nna, Hpyen dap ni shang shara la taw sai lam, Hpakant ginra masha langai KNG Shiga de n dai zawn tsun dan wa ai re.
“Mana de Mawsiza lam numbraw kaw Myen Hpyen Mawdaw hpe anhte maga na ni hkap adem jaw dat ai kaw, tsawm ra nyam mat sam ma ai. Nbungli the bawm shebai wa jahkrat bun hkra rai, masha chyawm hpa n byin sam ai,” nga tsun dan wa ai re.
Mana de Seng Tawng maga de hpyen shamu shamawt sa wa ai Myen Hpyen Mawdaw hpe Mawsiza lam numbraw shara kaw bawm hkap kapaw hkrum wa ai rai nga ai.
Dai hpang, Myen Hpyen dap maga na makau grup yin na Mung Shawa ni hpe ladu lai san jep ai lam galaw wa ai sha n ga, Mawsiza mare na Sky Hotel kaw manam ai, Manam ni hte Hotel magam gun ni yawng hpe gawt shapraw wa ai lam chye lu ai.
Sky Hotel na magam gun ni yawng hpe gawt shapraw kau nna, ya ten Myen Hpyen hpung ni dai Hotel kaw dap jung shara da ai rai nga ai.
Seng Tawng de htim sa wa ai Myen Hpyen Hpung ni hpe Malang Dung mare makau grup yin kaw KIA PDF hkap shingla gasat ai hta, Myen HPyen dap maga sum machyi law nna, bai thing nut mat ai gaw, n dai laman kalang bai Hpyen Shamu wa ai rai nga ai.
Hpakant ginra hta Ndai laman majan grai wa laja lana gap gasat hkat ai lam n nga tim, Myen Hpyen dap maga na Seng Tawng maga de bai shamu wa ai hpe KIA maga lam lapran bawm the hkap shingla gasat dat ai masa re lam, KIA the ni nawn ai ni tsun maram da ai re.
Myen Hpyen hpung ni Sky Hotel kaw shang shara la da ai majaw, Seng Tawng Lucky Man Hotel zawn rai byin wa na hpe Myit tsang ai lam, Mawsiza Buga ginra masha ni tsun ai re..
