Mandung Mare Nbungli Bawm Wa Jahkrat bun ai hta Mung Masha marai 4 Si nna, Marai 7 Hkala Sawng
Lahta Sammung Nam Du hte Man Dung mare ni hta Myen Hpyen dap nbungli bawm wa jahkrat bun ai majaw, Ma kaji hte hpawn mung shawa marai 11 si hkala hkrum wa ai lam ginra masha ni kaw na chye lu ai.
October praw 2 ya jahpawt hkying 7:15 aten Namdu Lawk (8) kaw bawm wa jahkrat bun ai hta Mung Shawa marai 4 asak si hkrum wa nna, marai 7 hkala hkrum wa ai lam Namdu ginra masha langai KNG de n dai zawn tsun dan da ai re.
“Nta Langai kaw na sha, shan moi ni 3 lawm mat ai ga rai nga ai, Kagu yan Kanam 2 gaw dai shara hta nan si mat nna, Kamoi ngu na wa gaw, Tsirung kaw du ai the si mat ai. Ya Kasha ngu na Ma langai mung Tsi rung rawng nga ai, ngut na, Balawng dinggai langai mung si ai, yawng marai 4 si ai ga rai nga ai. Namdu maga de na masa lam gaw, a tsawm tup hkrak rai n chye lu ai.” Nga na tsun dan wa ai re.
Nbungli bawm a majaw asak si hkrum ai marai 4 re ai hta Ma kaji marai langai lawm ai rai nna, si ai marai 3 gaw, nta langai kaw na sha re lam chye lu ai.
Nbungli wa gap ai majaw, dum n ta 4 mung tsep kawp la n mai hkra hten mat ai lam chye lu ai.
Mandung mare kaw Myen Hpyen nbungli bawm a majaw, si hkrum ai nig aw, Kyauk Me de na wa du hpawng yen taw nga ai mung mare masha ni rai nna, dai si hkrum ai hta amyu shayi marai 2 lawm ai lam chye lu ai.
Man Dung mare hpe bawm wa jahkrat bun ai gaw, n dai shawng ningnan lang rai nna, sadi jaw ai masa lam hku na wa jahkrat bun ai masa re nga ginra masha langai mung KNG de n dai zawn matut tsun maram tawn ai re.
“Namdu mare hpe Balawng ni gasat zing kau ai hpang, Myen hpyen dap nbungli bawm wa jahkrat ai gaw, n dai shawng ningnan lang re ga rai nga ai, n dai gaw TNLA dap ni Kyauk Me hpe yen kau da ya ai hpang, Namdu Mandung mare ni de bawm wa jahkrat bun ai lam rai nga ai, maram yu yang, sadi mu ngu ai lachyum re ga rai nga ai, hpa majaw nga yang n dai laman shara shagu na TNLA hpyen la ni Namdu Mandung Namsan ginra ni de mahkawng ma sai dai hpe shan hte chye ai majaw re.” nga na tsun dan wa ai re.
Balawng TNLA dap ni htim gasat zing madu da ai Kyauk Me Muklum kaba hpe Mani October praw 1 ya shani tat sum kau da ai re.
