Myen Hpyendap ni Hpa Majaw Sadung Pa Mare Hpe Nbungli Bawm Jahkrat Bun Ai.
Sadung Pa hpe Myen Hpyen dap Nbungli bawm wa jahkrat bun ai majaw, dai hpawt manap kaw na Hpaji jawng ni yawng pat kau nna, Mung shawa n kau ni mung tinang man ang ai shara ni de hprawng yen taw sai nga, Sadung Ginra masha langai KNG de n dai zawn tsun dan wa ai re.
“Jawng ni mung yawng pat kau sai gaw, Mung Shawa ni ya sha Solar Pya ni htaw lang rai Sengke n kau hte hprawng yen ma sai, yawng gaw hkrit let, tsang let rai mat ai hku rai nga ai, anhte yawng tak maram yu tim chye sai gaw,” nga tsun dan wa ai re.
Waimaw Kanpaiti Mawdaw lam kaba n tsa na Sadung Pa Mare hpe Myen hpyen dap maga September 29 ya shana de hkying 2 chyen aten daram hta Jet Nbungli 2 hte Bawm wa jahkrat bun ai majaw, Ma kaji marai 3 hte hpawn, marai 8 si hkrum wa nna, marai 6 Hkala sawng hkrum wa ai lam chye lu ai.
Nbungli bawm a majaw, Mung shawa dum n ta 10 daram hten za mat nna, Gat Seng yan 30 ram yawng hten ayai mat ai lam ginra masha ni tsun ai re.
Mana de Sadung Pa Mare hpe Myen Hpyen Dap Nbungli bawm wa jahkrat bun ai lam the seng nna, Dukaba NHpang Naw Bu KNG shiga de n dai zawn tsun dan da ai re.
“Maning shan the tat sum kau ai shara re majaw, da sang gap ai lam mung rai na re, bai Lamyang maga de mung shani shagu Majan kaba byin nga ai re. Ya aten ရွှေကောက်ပွဲ mung du ni wa ai majaw, shan the tat sum kau ai ginra ni hpe bai maden gasat la wa ai mung mai byin ai, shan hte tat sum kau da ai ginra yawng kaw anhte KIO Uphkang Sairu gran ai lam hpe n ra ai majaw, Mung shawa ni hpe hkrit mat hkra KIO hte matut mahkai ai lam, rau nga ai lam ni hkum galaw mu nga nna jahkrit sharim ai hku na wa jahkrat bun ai lam ni mung mai byin ai, Mung Shawa hpe zingri zingrat ai lam re. Majan mung n nga ai shara kaw, Mung shawa ni hkrai dut lu dut sha nga ai, gat yan kaw nan wa jahkrat bun ai lam gaw, Mung Shawa hpe zingri ai lam re ngu mayu ai,” nga nna tsun ai re.
Dai Nbungli 2 gaw, Myitkyina kaw na rawt lung wa ai rai nna, Hpyen mung n nga ai Mung shawa ni hkrai dut lu dut sha nga ai, Gat kaw wa jahkrat bun ai majaw, si hkala law wa ai lam mung rai nga ai.
Myen Hpyen Nbungli bawm wa jahkrat bun ai hta, Kani Dawn dabang kaw 2 wa hkrat nna, Gat Yang kaw lahkawng wa hkrat kapaw ai lam matut chye lu ai.
Myen Hpyen dap maga ya na zawn Mung Shawa ni hkrai nga ai shara kaw Bawm wa jahkrat bun ai lam the seng nna, Ginra masha langai n dai zawn matut tsun da ai re.
“Nbungli bawm wa jahkrat bun ai hpe maram yu yang gaw, dai shara kaw hpa hpyen mung n nga ai, hpyen dap shara mung n re ai, Mung Shawa Gat Seng the dum n ta ni sha nga ai shara re dan re kaw wa jahkrat ai majaw, n dai Myen hpyen dap gaw, Mung Shawa hpe kaja nan tsep kawp n ra ai Hpyendap re ngu sha mu lu ai,” nga nna tsun ai re.
Mung Shawa marai 8 si hkrum ai hta, Jawngma marai 3 lawm ai rai nna, laga ngam ai marai 5 gaw, asak kaba sai ni re lam chye lu ai.
Sadung ginra hpe Wunpawng Mungdan Shanglawt Hpyen Dap KIA the pawng hpawm dap ni lai wa sai 2024 ning June 11 ya shana gasat zing madu kau ai rai nga ai.
Sadung Ginra hpe Maning 2024 ning KIA gasat zing kau ai hpang, dai ginra de majan byin ai lam n nga sai re.
Ndai laman Myen Hpyen dap ni, Chihpwi Pang Wa, Langse ginra ni hpe bai gasat zing madu la lu na matu, Waimaw Lamyang hte Hkawng Lan Phu ginra ni hku na, Pyithutsit ni hpe n gun dat let htim gasat shangun taw nga ai re.
Myen Hpyen dap hte Pyithutsit ni KIA dap shara hpe htim gasat taw nga ai hta, Myen Hpyen Dap Up dukaba n kau hte Pyithutsit si hkala law taw ai majaw, ya na zawn, Mung shawa ni nga ai hkan Nbungli bawm hkan jahkrat bun wa ai re nga, ginra masha wa n dai zawn matut tsun dan da ai re.
“Myen ni gaw, Manmaw ga hte Waimaw Lamyang mare ni hta shanhte a အရာရှိ ni mung si ai re nga jang gaw, Nlung kaw njung Langa kaw jung ngu ai ga malai hku na wa jahkrat bun ai ga rai nga ai,” nga tsun ai re.
Lai wa sai bat Waimaw Lamyang majan hta Myen Hpyen dap maga na Hk.M.Y 318 dap na ningtau dap Up Dukaba langai si mat ai re.
Matut nna mung Manmaw Majan ginra ni hta mung KIA Drone a majaw, Myen Hpyen Dukaba si hkrum ai lam ni byin taw ai hpe sagawn chye lu ai.
