Daihpawt manap jau hkying 1 chyen aten daram hta Rahkaing AA hpyen n-gun 80 ram hte Pang Sai ninghtawn kata na KIA magam gun marai 18 hpe sa rim woi mat ai lam byin wa ai nga ginra masha ni kaw na chye lu ai.
December 17 ya shani Muse ginwang Ja Chyai Yang mare hta Pang Sai ninghtawn na Salang kaba A.D.O hte Rahkaing hpyenla ni ga law hkat wa ai kaw na, KIO Salang kaba wa Rahkaing hpyenla hpe baw adup waw ya ai majaw, dai hpawt manap jau Rahkaing hpyen n-gun 80 ram hte sa wa nna, Ninghtawn Salang kaba wa hte rau dai kaw nga ai hpyen la ni yawng hpe Rahkaing ni nga ai Hka Lum de rim woi mat ai nga, dai ginra na KIO hte ni nawn ai amyu shayi langai KNG de tsun dan wa ai re.
“Mani shawng shani tsa nang nna, Pang Sai kaw na ninghtawn Salang kaba wa Rahkaing hpyenla langai hpe baw adup waw ya ai da, dai mang hkang byin ai kaw na mana gaw Rahkaing hpyenla ni hpyen n’gun hte sa wa na shaga woi ai ga rai nga ai.” nga KNG de tsun dan wa ai re.
Rahkaing AA dap ni KIA magam gun ni hpe sa shaga rim woi ai hta, adup abyen zingri ai lam ni mung nga wa nna, KIO ninghtawn rung kata na Sinat Computer hte arung arai nkau hpe mung la mat wa ya ai lam chye lu ai.
Dai zawn rim woi mat ai KIA magam gun ni hte sinat Computer arung arai n kau hpe gaw dai hpawt manap bai jaw dat sai rai tim, Sengke hte gumhpraw nkau hpe gaw rai n jaw shi ai lam chye lu ai.
Ndai mang hkang byin wa ai gaw, KIO maga na shawng Rahkaing hpyenla wa hpe lata du baw adup waw ya ai majaw, “Nan hte KIA ni anhte Rahkaing ni hpe grai roi ai re” ngu na tsun let sa rim woi ai nga matut tsun dan wa ai re.
Ya ten n dai amu manghkang lam hte seng nna, lahkawng maga tsun jahkrup bawngban taw nga nna, a tsawm prinem hkra tsun jahta la lu sai lam chye lu ai re.
Dai ginra yawng hpe 1027 majan masing ten hta KOkang MNDAA dap woi awn ai hte pawng hpawm dap ni htim gasat zing madu da lu ai shara ni rai nna, dai ginra ni hta dap hpawm hku na yawng jawm nga taw ai shara ni mung rai nga ai.
