Lido lam kaba n tsa na KIO Costom shagyit hpe Min Zay Thant sa gap gasat
Hugawng Lido lam kaba Lawa hte hkumtsai Zup mare lapran na KIO a Costom shagyit hpe Min Zay Thant hpyen hpung ni kaw na mani hpawt December 17 ya jahpawt hkying 9 chyen ten daram hta sa htim gap gasat wa ai majaw, KIA maga si hkala ai lam ni nga wa ai nga ginra masha ni tsun ai re.
Min Zay Thant Pyithutsit hpung ni gaw Jahtu Zup maga de na mawdaw 2 hte yu wa na wa htim gap gasat wa ai majaw, dai Custom shagyit kaw magam gun nga ai magam gun n kau si hkala hkrum wa ai nga, magam gun hte ni nawn ai ni KNG de tsun shaga wa ai re.
“Gadai mung n sadi da ai kaw, akajawng sha mawdaw lahkawng hte yu wa na sa gap kau da ai. dai kaw nan marai 4 kalang ta hkrat ai, marai 2 hkala ai,” nga tsun dan wa ai re.
Dai sa htim gap gasat ai hta Pyithutsit hpyen n’gun 10 jan hte sha sa gap gasat mat wa ai re.
Lawa mare makau na Custom gate gap gasat hkrum ai lam hte seng na, teng ai rai tim, kata lam mabyin masa lam hte seng na a tsawm tup hkrak rai n chye lu shi ai nga Dukaba Nhpang Naw Bu KNG de tsun ai re.
Ya gap gasat hkrum ai Custom gate shara gaw KIA masat dap dung (20) na Custom shagyit rai nna, Lawa mare baw hta jahkrat da ai shara re hpe chye lu ai.
Ya ten dai ginra hta hpa majan byin ai lam mung n nga ai rai tim, Min Zay Thant Pyithutsit dap maga na KIA shagyit hpe je la tam ai hku na nan sa gap gasat mat wa ai re nga, ginra masha ni maroi nni tsun garu nga ma ai re.
