Sengtawng mare na hprawng yen pru wa ai hpyen yen mung shawa 4000 jan a matu garum ningtum lam ni ra ahkyak taw nga ai re.
Lai wa sai September praw 7 ya shani kaw na Sengtawng mare hta gap gasat hkat wa ai majaw dai mare na mung shawa ni, shani shagu hprawng pru taw nga ai rai nna, dai hprawng yen pru wa ai hpyen yen mung shawa ni hpe shara hkap jaw la na matu hte laga malu masha tsi mawan ni yawng hkyak hkyak ra gadawn taw nga ai lam hpyen yen ni hpe yu lakawn taw nga ai ni tsun ai re.
“Sengtawng hpyen yen mung shawa hkying 4,5 hkawt du wa sai, Maw ginra shagu na hpungkyi jawng hte Nawku jawng ni hkan mung hpring ma sai, hkap madun la na shara n nga ma wa sai, malu masha gaw yak, ya madung grau yak taw ai gaw lu hka, lang hka rai nga ai, hkawm sa hkawm wa gaw yak, ya mung mare kaw n kau naw pat hkrum taw nga ai.” nga Sengtawng ginra masha langai tsun ai re.
Majan aten ladaw galu wa ai hte rau hpyen yen mung shawa grau grau law jat wa nna, n kau Sengtawng mare kata naw pat hkrum taw nga ai lam, hpyen yen ni hpe yu lakawn taw nga ai ni tsun ai re.
September 17 ya shani hta garum ningtum hpung ni a majaw Sengtawng mare pat hkrum taw nga ai mung shawa n kau hte Hotel magam gun n kau hpe sa hkye shaw la lu ai rai tim, matut na, mung shawa n kau naw pat hkrum taw nga ai re.
Myen hpyen dap maga na mung shawa ni hpe n pru shangun ai sha dai hku pat hkum da ai lam gaw, Majan byin ai n htoi 10 ya laman hta mung shawa ni hpe hkrup mara zingri gap sat ai lam ni galaw da ai majaw hte dum n ta nat jahten re ai lam ni, shiga brawng na hkrit ai majaw mung shawa ni hpe n shapraw ai masa re lam ginra masha ni tsun maram da ai re.
“Ya kata kaw naw ngam rawng taw nga ai ngu gaw, majan a majaw pat hkrum taw ai n re sha, Sengtawng mare hta Myen hpyen hpung ni tawt lai da ai masha sat ai lam ni, n ta wan nat jahten ai lam ni, shinggan de brawng mat na tsang ai majaw, n shapraw ai re ngu mu mada ai,” nga tsun ai re.
Sengtawng mare hta Myen hpyen dap gap sat da ai mung shawa marai 40 hkawt ram nga ai lam garum kahtau hpung ni kawn tsun maram da ai re.
Ya ten Sengtawng mare Lucky Man Hotel kata hta Myen hpyen n gun 40 daram naw rawng nga ai hpe KIA dap maga n mai pru hkra wang da nna, shani shagu gap gasat hkat ai lam ni byin nga ai re.
