Kachin State People’s Party KSPP gaw Myen hpyendap n pu tara shang party shawk shawn ai hpe Myen hpyendap maga mung ahkang jaw masat dat ya ai n tsa, jinghpaw mung shawa masha ni lapran tsun dinglun ai lam law law nga taw ai re.
Lai wa sai 2020 ning ra lata poi hta Jinghpaw mung shawa law law madi shadaw n gun jaw wa ai Kachin State People’s Party KSPP gaw Party hkrung grin nga na matu ngu ai ga baw hte Myen hpyendap n pu 2023 ning March shata ram hta mying kalang bai shawk shawn tawn ai rai nga ai.
Dai shawk shawn da ai lam hpe dai ning 2024, August 19 ya shani gaw mungmasa party mying shawk ai Upadi masat 9 hte maren ahkang jaw dat sai lam, Myen hpyendap ndau dat ai re.
Kachin State People’s party KSPP lit nga ai ni hpe KNG kaw nna matut mahkai ai raitim, Phone, Internet line mayak a majaw matut mahkai n lu shi ai re.
Myen hpyendap kaw kalang bai mying bang shawk shawn ai Kachin Party 4 hta Kachin National Congress KNC party hpe gaw Myen hpyendap a ralata poi Commission kaw nna mying nhkap la ai lam lai wa sai July praw 9 ya shani ndau tawn ai re.
Kachin State People’s Party KSPP, Lisu National Development Party LNDP hte New Democracy Party Kachin NDPK dai party 3 hpe gaw myen hpyendap masat a hkang jaw ai re.
Fedaral Democracy lu la lam hta maga mi hku shakut shaja nga ai JInghpaw ramma langai mung myen hpyendap shakut nga ai ra lata poi n byin hkra Party ni sha n ga, mung shawa yawng jawm ninghkap shakut ra ai lam tsun tawn ai re.
Kachin State People’s Party KSPP gaw lai wa sai 2020 ning ra lata poi hta Jinghpaw mung kata shara 67 hta ra lata poi shanglawm shingjawng wa nna, shara 3 hta dat kasa marai 4 sindan pa dang wa ai re.
Kachin State People’s Party KSPP ningbaw Dr.Manam Tu Ja gaw Lai wa sai 2009 ning shawng daw , Wunpawng mungdan shanglawt hpung KIO Ningtau ningbaw shara hta aten na na lit la ga ai re. Bai nna KSPP a ningtau ningbaw magam langai hta lit la wa ai Jan Doi Bu gaw ya ten Myen hpyendap Council malawm langai rai nga ai.
