Nawng Hkying Laban Hpyen Yen Mung Shawa Ni Hka Hpyen Bai Hkrum Kahtap Nna Garum Ningtum Ra Ahkyak Taw Nga

Nawng Hkying hte Laban mare ni hta wa du hprawng yen nga ai hpyen yen mung shawa ni hta, Hka hpyen bai gahtap hkrum ai majaw, malu masha hte tsi mawan hkyak hkyak ra kadawn taw nga ai lam hpyen yen lit nga ai ni tsun ai re.

Dai hpawt manap kaw na mali hka gau ngwi ngwi bai hkyet mat wa sai rai tim, hka kaba ai majaw, hten mat ai yup shara ginsum ni hte lu hka, lang hka ni tsep kawp n nga ai majaw, yak hkak hkrum taw nga ai lam, hpyen yen dabang na lit nga ai amyu shayi langai KNG shiga dap de tsun dan wa ai re.

“Hka gaw hkyet wa sa, anhte hpyen yen dabang la hpa pyi n nga sai, yawng hkum pup nawng tai ma sai, gara hku na galaw hpang la ra ai baw re pyi n chye sai, lu hka lang hka gaw yak, hkawm sa hkawm wa mung yak, kaning di na asak matut na nga ra na re pyi n chye sai,” nga tsun ai re.

Lai wa sai shata hta sha hpyen yen mung shawa ni a matu gap da ya ai gin sum ni yawng hka kaba ai ten wa lim mat ai majaw, ya ten dai shara ni hta nga n mai mat sai rai nn, ya gan shingbyi rawng na dum nta ni mung bai ra ahkyak taw nga sai re.

June 30 ya shana kaw na hka kaba wa ai majaw, hpyen yen ginsum hta rawng nga ai mung shawa yawng hpe nawku jawng wang hte hpaji jawng ni hta htawt sit hprawng yen wa ai rai nga ai.

Dai hpyen yen mung shawa ni gaw, hka kaba wa ai hte rau tinang a arung arai n kau mung hka kaba ai hta lawm mat ai majaw, garum ningtum lam ni mung matut ra gadawn taw nga ai re.

ya ten Waimaw hpyen yen mung shawa ni gaw, hpyen yen dabang ginsum gaw gap la na matu hte machyi makaw law taw nga ai majaw, malu masha tsi mawan lam ni ra ahkyak taw nga ai re.