Jarit mayan hta nga ai hpyen yen mung shawa ni, ndai laman malu masha htaw shalai la na matu grai yak hkak wa ai majaw, dinghku kata lam shagu yak hkak wa taw nga ai lam, hpyen yen mung shawa ni tsun ai re.
Myen hpyen dap hte KIA dap lapran lai wa sai July shata kaw na, Myitkyina Manmaw lam kaba ntsa majan bai gap gasat hkat wa ai majaw, dai lam yawng pat mat nna, ya ten malu masha htaw shalai la na grai yak hkak wa taw nga ai lam, Jeyang hpyen yen mung shawa langai KNG shiga dap de tsun ai re.
“Anhte jarit de nga ai ni grai yak wa ai, tam sha mung n mai, hkai sha shara mung nlu, garum ningtum gaw yawm wa, Myitkyina de na gunrai gaw nshang, Mai Ja Yang maga de na re nga yang htam lahkawng ram htaw manu grau tsaw mat, ya mung masa gaw npyaw, Laiza mare ni pyi bai yen wa ra, kaning rai na kun n chye sai law.” Nga tsun ai re.
Ya ten Laiza makau grup yin hta hpyen masa kahtet taw nga ai majaw, Laiza ginra na mung shawa ni mung, shim lum ai shara de sa htawt sit yen taw nga ai rai nna, lani hte lani malu masha ni yak hkak wa taw nga ai re lam matut tsun ai.
Myitkyina Manmaw lam tsep kawp pat mat ai hpang kaw na, Mai Ja yang maga de na malu masha htaw shalai la ra taw ai majaw, gun rai manu ni mung shawoi na hta htam lahkawng manu grau tsaw rawt mat ai lam chye lu ai.
Jarit mayan hta nga ai hpyen yen mung shawa ni yawng ndai ten lam shagu hta myit tsang let nga taw ra nna, garum ningtum lam ni lani hte lani grau grau yawm wa taw nga ai mung rai nga ai.
