Mungmyit Sinli, Kutkai mare kaba hta Myen hpyen dap hte dingdung daw dap hpawm hpung ni lapran majan laja lana gap gasat hkat taw nga ai lam chye lu ai.
December 20 ya shani kaw na majan laja wa ai hte rau Phone Internet line ni hpe mung pat kau ya ai re lam, December 21 ya shani Kutkai kaw nna Lashio de yu wa ai mung shawa langai KNG hpe tsun dan ai re.
“dai ni mung lahkawng maga laknak kaba ni hte gap bun hkat taw nga ai, Myen hpyen dap nbungli hte mung wa gap taw nga ai, Kutkai pa ting Phone Internet line ni mung pat da ya ai,” nga nna tsun dan ai re.
Namhkam Myen hpyen dap hpe htim gasat zing madu la ngut ai hpang, Kutkai mare de bai htim gasat wa ai mung rai nga ai.
Ya ten Kutkai mare kaba hta daw hte daw garan nna, koi yen shangun taw nga nna, shani hkan mung shinggan de pru hkawm sa ai lam n galaw na matu tsun sadi jaw da ai lam hpe chye lu ai.
Lai wa sai bat lahkawng daram kaw na, Myen hpyen dap balik dap hte ni ai mare masha n kau gaw, bum de hprawng yen ai ni mung nga sai rai nna, ya ten n kau mare hta pat hkrum taw nga ai ni mung naw nga taw ai lam chye lu ai.
Kutkai pa majan masa lam laja taw nga ai rai tim, Phone Internet line n lu ai majaw, ginra masha ni hpe a tsawm dan tawk san la lu na lam hta yak hkak taw nga ai re.
