Hpakant, Lunghkang mare Lay Pyin pawng hpawm shagyit hpe shim lam n nga dum ai majaw, Myen hpyen dap maga dawm kau sai lam, ginra masha ni kaw nna chye lu ai.
Dai shagyit hta Myen hpyen dap n pu, Uphkang dap, Balik dap, hpyen dap, masha pru shang gawn hkang dap, Mawdaw sengke gawn hkang dap, စရဖ yawng pawm hpawm dung ai shagyit kaba rai nna, November praw 6 ya shani shim lam kabaw hte yawng dawm kau sai nga, Lung Hkang ginra masha langai KNG shiga dap de tsun dan ai re.
“November praw 6 ya jahpawt hkying 10 daram hta dawm kau ma ai, shim lam a majaw nga na sha tsun ai, dai shara kaw na, Bawm yam tawn ai Balik dap de yawng pawng mat ai da.” nga tsun ai re.
Dawm kau ai shagyit gaw, Hpakant de shang ai mawdaw kaji kaba ma hkra hpe gumhpraw hta sha taw ai shagyit rai nna, hkrun lam hkawm mung shawa ni hpe mung laja lana san jep ai shara re lam, matut chye lu ai.
Lay Pyin pawng hpawm shagyit hta nga ai magam gun ni yawng, Lung Hkang, Bawm Yam Balik dap de wa pawng hpawm mat nna, dai balik dap shawng kaw shagyit bai jahkrat da ai lam ginra masha ni matut tsun dan ai re.
Myen hpyen dap daru magam zing kau ai hpang, Myitkyina – Hpakant lam lapran shagyit kaji kaba yawng 20 daram nga ai rai nna, dai shagyit ni yawng hta gumhpraw jaw na lai ra taw ai lam chye lu ai.
Ndai laman Hpakant muklum numshang, Pan Tin mahkrai na Myen hpyen dap shagyit jahkring hkring htim gasat hkrum wa ai re.
