Hpakant, Sengtawng mare kaw nga ai La langai hpe KIA hte matut mahkai ai ngu tsun let, Myen hpyen dap ni rim woi mat ai lam, ginra masha ni kaw nna chye lu ai.
Sengtawng mare, Hpayar Kung lawk hta nga ai asak 45 ning re U Chyit Ko hpe Myen hpyen dap ni June 25 ya shana hkying 5 daram hta, rim woi mat ai lam Sengtawng mare masha langai KNG de tsun ai.
“Mani shi kasha hpe Ma shalat jawng na sa tau na matu sa ai kaw rim hkrum ai re. Lam maw kaw rim hkrum mat ai re” nga nna tsun ai.
Rim hkrum ai wa gaw lung seng dut mari hpaga galaw ai wa rai nna, lai wa sai shani shang zing hkrum ai Sengtawng mare kaw nga ai ninghtawn rung hte seng ai masha re ngu nna rim woi mat ai lam chye lu ai.
Rim hkrum ai wa hpe hpakant maga de shaga woi mat nna, gara shara kaw rim da ai lam, hpa majaw rim mat ai lam hpe KNG hku nna, tup hkrak n chye lu shi ai re.
Hpakant ginra kata, Myen hpyen dap ni gaw KIA/PDF hte seng ai ni, magam gun ni hpe jahkring hkring rim ai lam galaw nga ai rai nna, ndai shata laman sha pyi, rim hkrum ai marai 30 jan nga wa sai lam chye lu ai.
