Shwegu Mawlamyaing lawk (2) kaw Myen Hpyen nbungli bawm wa jahkrat ai majaw, Ma hkum kanu langai hte mung shawa marai (4) hkala hkrum ai lam chye lu ai.
August 20 ya shana maga hkying 4:38 ten Shwegu Mukdi Bo Hkali Daru Makau kaw Jet Nbungli kaw na Rocket Bawm (2) wa jahkrat bun ai majaw mung shawa marai 4 hkala hkrum wa ai nga dai ginra na mung shawa ni KNG shiga dap de tsun dan wa ai re.
Shwegu de wa jahkrat ai Myen hpyen nbungli ni gaw, Mandalay kaw na nbungli (5) pyen lung wa nna, Shwegu ginra kaw lahkawng wa jahkrat bun da nna, ngam ai nbungli ni gaw, kaga ginra ni de wa jahkrat bun ai lam matut tsun dan wa ai re.
August 20 ya jahpawt Shwegu malihka Sinna hkran Sin Tat, Ye Lay mare ni kaw mung bawm wa jahkrat bun ai majaw, mung shawa hkala hkrum ai lam ni nga ai hpe chye lu ai.
August 18 ya shani hta mung Myen hpyen Jet Nbungli hte Myokung Tsirung hpe bawm wa jahkrat ai majaw, Tsirung n ta yawng hten ayai mat ai hpe chye lu ai.
Shwegu kaw Myen hpyen nbungli bawm wa jahkrat bun ai majaw, Mawdaw jakli langai lup mat nna, dum n ta 2 mung hkra hten ai lam nga ai hpe chye lu ai.
Ndai laman Myen Hpyen ni Shwegu de Hka Sanghpaw lung wa na matu hka lam gap jasan ai masa hku shakut taw ai re nga, ginra masha ni tsun ai rai tim, KNG hku na alak mi san shateng lu ai lam n nga ai re.
Myen Hpyen hkasanghpaw ni gaw, n dai hka kaba ai ten hpe ahkaw ahkang la nna, Hpyen Sanghpaw shaning shagu lung ai ten re lam mung chye lu ai.
Ndai laman Myen hpyen nbungli bawm ding yang wa jahkrat bun nga ai majaw, mung shawa si hkala lam ni shani shagu byin nga ai re.
