Myen Hpyen ni Mawlu Hpe Gasat Zing ngut ai hpang, gara de bai gasat wa na kun?
Mawlu Muklum hpe yen kau ya ai gaw, Muklum kata na mung shawa dum n ta hte Mungchying mung shawa hkra machyi na hpe myit tsang na yen kau ya ai re nga, Rawt malan hpung maga tsun da ai re.
Mawlu hpe Myen ni gasat zing kau sai lam ndau tawn ai rai tim, Mare makau shinggan ni de gaw, dai ni ten du hkra, majan naw matut gap gasat hkat taw nga ai lam chye lu ai.
Indaw Mawlu hpe htim gasat zing ai Myen hpyen ni gaw, ya ten Namsi Awng mare kaw wa du nga ai lam chye lu ai.
Myen hpyen dap ni Indaw Mawlu hpe gasat zing ngut nna, Namsi Awng kaw wa du nga ai hpe maram yu yang, KIA ni up madu tawn ai Namhkyi Lungseng Maw hte Sezin Hpakant matu ai lam maga de bai htim gasat wa na masa nga ai lam, Wanleng lam mayan kaw nga ai Salang langai KNG shiga de n dai zawn tsun maram tawn ai re.
“Ya Myen ni gaw Namsi Awng kaw wa mahkawng taw ma ai, Ya shan hte Mawlu Indaw Namsi Awng mare ni kaw da hprang nna, ndai jinghpaw mung maga de bai htim gasat na masa hpe mu lu ai, shawng nnan gaw, Hpakant hpe lu na matu ndai Namhkyi lungseng maw de shawng htim gasat wa na masa nga ai, Namhkyi Lungseng maw kaw na, Indaw Nawnglut maga hku Hpakant Dapba (9) ni de htim gasat wa na masa nga ai,” nga tsun ai re.
Nga-O kaw na Shwegu de pru wa ai Myen Hpyen hpung ni hpe, lam lapran KPDF ni hkap shingla gasat ai majaw, Myen hpyen maga sum machyi nna, Nga- O de sha bai n htang shang mat ai nga, shawng lam hpyen magam gun ni tsun ai re.
Ya ten, Jinghpaw Mung Sagaing Jarit mayan ni hta Myen hpyen dap hte KIA PDF ni laja lana gap gasat hkat taw nga nna, Sagaing lahta daw hpe gasat zing ngut ai hpang, Jinghpaw mung de bai majan laja wa na masa nga taw ai lam hpyen masa yu maram ai ni tsun da ai re.
Myen Hpyen dap ni lai wa sai May Shata hta Katha hpe zep zi bai htim gasat zing kau ai hpang, Jinghpaw mung maga de Hpyen n gun kaba hkying lam hte htim gasat taw nga ai re.
Myen ni n dai laman Mawlu hpe gasat zing madu la ngut ai hpang, Myo Hla Shwegu maga de bai majan laja wa na masa nga ai lam, hpyen magam gun ni tsun maram da ai re.
Ya ten Shwegu muklum hpe gaw, KIA PDF pawng hpawm ni mare grup yin yawng hta shara naw lu la da ai re lam chye lu ai.
