Hpakant Mawsiza Hpungkyi Jawng na pru wa ai Myen Hpyen Hpung ni Marau Mare lung wa ai gadawng kaw laknak kaba kapaw wa ai majaw, dai makau grup yin na mung shawa dum n ta ni yawng kanan ai lam byin wa ai nga ginra masha ni tsun ai re.
November 25 ya jahpawt hkying 11 aten daram hta Marau mare de Myen Hpyen hpung ni lung wa ai majaw, KIA maga Drone bawm hte hkap shingla gasat dat ai rai na masa nga ai lam, ginra masha langai KNG de n dai zawn tsun dan wa ai re.
“Dai hpawt Jau Mawsi za Hpungkyi jawng kaw na Shingma ba ni mung lawm rai hpyen hking hku hte hkrak Kate maga de shamawt lung wa sai ngu yang, Marau kadawng kaw hkap gasat hkrum ai ga rai nga ai,” nga tsun dan ai re.
Ya ten Marau Maw Nawku Jawng wang hta Myen Hpyen la marai 100 jan wa du but rawng taw nga nna, makau grup yin ni hta Drone bawm hkan jahkrat bun taw nga ai lam, ginra mash ani matut tsun ai re.
Dai hpawt manap Myen Hpyen dap bawm hkap shingla gasat hkrum ai majaw, KIA Dapba 9 de Myen HPyen nbungli bawm sa jahkrat bun wa ai lam ginra masha ni kaw na matut chye lu ai.
Dapba 9 de nbungli bawm sa jahkrat ai lam the seng na, gade daram gara kaw wa hkrat ai ngu hpe gaw, a tsawm tup hkrak rai n chye lu shi ai re.
Dai hpawt manap jau kaw na Myen Hpyen hpung ni, laknak machyu pala hking hku hkum hkra the Kate mare de shang wa ai hpang, Marau mare de bai lai lung wa ai ten, hkap shingla gasat hkrum wa ai rai na masa nga ai lam ginra masha ni tsun maram da ai re.
Kate, Masa, Kahtan, Hpawa maw maga de hpyen man n nan bai hpaw wa ai masa re lam matut tsun dan ai re.
Dai hpawt hkap kapaw hkrum ai Myen Hpyen hpung ni gaw, Mawsiza mare kaw na le wa ai hpyen hpung ni re chye lu ai.
Myen Hpyen dap ni gaw, Hpakant ginra hta, Ra lata poi galaw lu hkra, shani shagu hpyen shamu shamawt ai lam ni galaw taw nga ai lam chye lu ai re.