Waimaw Ginra de Myen Hpyen dap hte Pyithutsit ni pawng nna, Hpyen N’gun kaba hte bai htu shadut htim gasat na matu hkyen shajin taw ai lam ginra masha langai KNG de tsun dan wa ai re.
“Ndai laman KIA de အလင်း shang ai ni mung nga ma ai, n shang ai ni mung law law re. Ya dai အလင်း n shang ai ni gaw, htaw ra ginra de bai gasat zing la na hku tsun taw ai ni rai nga ai, ya n dai laman Myen ni Myitkyina hte Waimaw kaw hpyen n-gun mahkawng taw ai lam na lu ai, 700 ram mahkawng da sai lam chye lu ai, dai အလင်း n shang na ngam taw ai ni she Myen ni hpe nut na hku tsun shaja, Myen ni gaw yaw mu yaw mu nga n-gun bai jaw, ra ai laknak machyu pala ni bai htuk jaw ra, shada da gasat hkat si shangun taw ai ga rai nga ai,” nga tsun ai re.
Lai was ai bat na majan hta Myen Hpyen dap maga na lu rim ai bawng masha jahpan hta anhte shada hpan ni mung grai lawm ai rai nna, tsi hkyep ni majoi the jaw lu nna, shawng de majoi gwi si wa si htim shangun ai lam ni galaw wa ai nga, KIA hte ni nawn ai nit sun ai re.
Myen Hpyen dap ni lai wa sai bat kru ya shani hta mung hpyen n gun kaba hte htu gasat lung wa ai hpe KIA maga hkap shingla gasat ai majaw, Myen Hpyen dap maga sum machyi law ai hte bai htingnut mat ai lam mung rai nga ai.
Myen Hpyen dap ni n dai laman Waimaw ginra hpe Nbungli the shani shagu wa gap gasat nga ai zawn, n dai laman wa gap gasat ai gaw, shawoi na lung ai lam hku n re sha, laga lam hku lung wa na she wa gap gasat ai re lam ginra masha wa n dai zawn matut tsundan da ai re.
“Nbungli gaw shawoi lung ai Waimaw hku na pyi n lung mat sai, ndai laman gaw, Sama bum maga hku gawoi nna she bai wa gap taw nga ai, shan hte mung grai hkrit sam ma ai, grai tsaw dik ai mu n mu re kaw na she jahkrat bun ai,” nga nna, Ginra masha wa matut tsun dan ai re.
Myen Hpyen dap maga ya na zawn, Waimaw ginra hpe laja lana bai htim gasat wa ai lam gaw, Kanpaiti Waimaw lam kaba hpe a tsawm sha up madu lu na lam hte Gasau nhprang pru ai ginra ni yawng hpe bai gasat up madu la mayu ai majaw, laja lana matut htim gasat wa mai ai lam hpyen masa yu maram taw ai Salang langai KNG de n dai zawn tsun dan wa ai re.
“Waimaw Lamyang Mukchyik dai grup yin de majan laja lana htim gasat wa ai gaw, lawng lam lahkawng na majaw re ngu mu mada ai, langai gaw Ndai Miwa the India Mawdaw lam kaba waw na masing hte seng nna, Kanpaiti lam kaba ding yang hpe shan the atsawm sha up madu kau mayu ai, ngut na lahkawng gaw, Ya Mungkan kaw Gasau gaw grai ra ahkyak wa ai, dai majaw, gaw Ga sau Nhprang pru ai ginra ni yawng hpe bai lu la hkra gasat wa na masa nga ai,” nga nna, tsun maram tawn ai re.
Ya majan byin nga ai shara gaw, Miwa hte hpaga gunrai ginlen lam hta ahkyak ai mawdaw lam kaba makau grup yin ni hta re lam mu lu ai re.
Ya na zawn Waimaw ginra hta majan laja wa ai gaw, Kanpaiti lam kaba hpe bai up madu mayu ai hte Gasau nhprang pru ai ginra ni hpe bai lu la na matu, Myen Hpyen dap hte Pyithutsit dap ni shakut taw nga ai masa re lam tsun tawn ai re.
Ndai masa lam hta, Waimaw majan gaw, n dai hta na grau laja lana naw mai byin wa ai lam mung matut tsun maram da ai re.
“Ya n dai Ginhtawng laman Majan gaw grau na laja lana mai byin wa ai, Waimaw, Washawng, Kanpaiti lam ding yang hta gaw naw byin ni re, Myen ni mung madang tsaw ai Drone laknak hpan hkum ni hte htim gasat wa na re, dai majaw anhte maga na mung, ra ai lam hpe gaw tau hkrau hkyen shajin da ra na re,” nga nna, matut tsun da ai re.
Waimaw ginra hpe, Wunpawng Mungdan Shanglawt Hpyen Dap KIA woi awn ai hte pawng hpawm dap ni, Maning 2024 March Shata hta htim gasat kau ma n na, madung ahkyak ai, Waimaw HK.L.Y( 58) dap the Wuyan Pyithutsit dap hpe n gasat ai shangam da ai rai nga ai.
Ya ten Myen Hpyen dap the Pyithutsit BGF ni gaw, Myitkyina Myen Hpyen dap daju M.P.Hk the Waimaw HK.L.Y( 58) dap ni hta masha n gun mahkawng nna, kalang bai htim gasat na matu hkyen shajin taw nga ai mung rai nga ai.