Manmaw htim gasat majan laja lana naw matut byin nga ai zawn, Hotel zawn re ai n ta kaba htap tsaw ai shara ni hta Majan ding yang naw matut byin nga ai rai nna, KIA maga 366 dap hpe bai lu zing ai lam mung n nga ai nga, Dukaba Nhpang Naw Bu tsun ai re.
Lai wa sai bat kru ya shani KIA gan tat sum da ai Manmaw (366) Myawk dap hte Nbungli pa ni hpe bai gasat zing la lu sai lam, Online n tsa ni hta tsun garu taw nga ai lam hpe KIA Shiga magam dap lithkam Dukaba Nhpang Naw Bu gaw n dai zawn tsun dan wa ai re.
“Manmaw maga de gaw dap zing lu ai lam n nga ai, Majan gaw Myoma lawk ni rai nga ai, Myit Sone Hotel, Win Light Hotel, စုပေါင်းရုံး nga ai maga de majan gaw grai laja taw nga ai, ngut na Ta Mai Lung, Manmaw Dakkasu, Nam Hpa, Min Hla, maga de mung e majan gaw grau laja taw nga ai, Dap zing ai lam the seng nna, anhte maga na zing ai lam n nga ai zawn, Myen ni maga na mung zing ai lam hpa n nga ai,” nga tsun ai re.
Myen Hpyen Dap gaw, Manmaw muklum kaba hpe ndai August Shata praw kaw Hka lam hku na laknak machyu pala the malu masha ni bai htaw shadu la lu wa ai hpang, Pawng hpawm dap ni dap jung shara jahkrat da ai ai dap shara ni hpe bai htim gasat wa ai rai nga ai.
Ndai laman Myen Hpyen dap maga na Suicide Drone hpan ni hpe alaw alam jai lang gasat wa ai hpe mu lu nga ai re.
Myen Hpyen dap maga, Drone bawm hte Nbungli ni the laja lana sa gap gasat bun wa ai majaw, masat (366) Myawk dap hte Nbungli pa ni hpe loi li gan htingnut yen kau da ya ra mat ai masa lam mung rai nga ai.
Ndai ten, lanam ta ten re majaw, Shawng lam magam gun ni ga gaduk htu na yak hkak ai majaw, jahkring gan yen da ya ai masa sha rai na re nga, Mung masa yu maram ai Salang langai KNG de n dai zawn matut tsun wa ai re.
“Hpa majaw yak ai ta nga yang, Manmaw gaw layang ga re nga yang hka ing ai shara law ai re majaw, lanam ta kaw kaduk ni n mai htu re majaw Shanglawt maga na yak hkak ai lam ni law law nga ai hpe Myen ni chye ai, dai hpe ahkaw ahkang la nna, n-gun kaba nbungli ni the rai na gasat taw ai ga rai nga ai. Ya hpa baw mai byin wa na i nga jang, ya ginhtawng htawng wa jang lahkawng maga grai shaja hkat wa mai ai, majan a masa lam a majaw jahkring jahkra gan yen da ya ai sha rai na re,” nga tsun maram tawn ai re.
Myen Hpyen dap maga n dai lanam ta aten Hka kaba ai hpe ahkaw ahkang la nna, Mandalay kaw na July 17 ya shani hte 22 ya shani Hpyen Hka Sanghpawli kaba ni the shim lam la y anna, Sanghpaw 10 jan Ndai August Shata praw kaw Manmaw de du lung wa ai mung rai nga ai.
Dai Hka Sanghpaw ni Manmaw de du ai hpang, KIA the pawng hpawm dap ni hpe တန်ပြန်ထိုးစစ် bai galaw wa ai masa mung rai nga ai.