Jeyang Hka Mawru a majaw, Mung Shawa marai 6 si nna,Jarit mayan na Mung Shawa Hpyen yen dum n ta 460 hte ahkyak ai mahkrai 7 hten za mat ai lam KIO Shiga dap Alen Yang TV lamang hta tsun mat ai re.
August praw 5 ya shana shapoi mat ai Alen Yang TV lamang hta, Jeyang Hka Mawru a majaw, Mung Shawa marai 6 asak si hkrum nna, Hpyen yen dum n ta 468 hte Munglai Hka mahkrai, Laja Yang mahkrai, Nalung, Man Sai mare hkan na mahkrai ni daw hten mat ai lam tsun da ai re.
“August praw 4 ya shana Marang kaba htu ai majaw, Shana yup tung hkying 2 aten daram kaw na Jeyang hka kaba mawru ru wa ai majaw, Jahtu Kawng Nlu ga bungli dabang na bungli galaw masha marai 3, Golf Pa na marai 3 si mat nna, dum n ta 468 yawng la hpa n nga hten mat nna, Laja Yang mahkrai, Nalung, Man Sai mare hkan na mahkrai ni hten mat ai,” nga tsun da ai re.
Ya ten Mai Ja Yang the Laiza lam lapran Ga sharut gyi kaput taw ai majaw, Laiza Mai Ja Yang lam tsep kawp n mai hkawm sa taw ai lam matut chye lu ai re.
Ndai laman Hka mawru a majaw, Jeyang hte Laiza lapran hkawm sa na matu pyin loi mat sai lam, Hpyen yen mung shawa ni tsun ai re.
Ya ten jarit mayan na hpyen yen mung shawa hkying 4 jan gaw, garum ningtum hkyak hkyak ra gadawn nga ai hta, Lusha, Buhun Palawng the Hpun nba, Dunghku lang rung rai, Ginsum, San Seng Sanpan lam rung rai, Tsi mawan lam ni ra ahkyak taw nga ai re.
Hka Hpyen hkrum ai mung shawa ni ya ten, Nawku htingnu hte laga man ai shara ni hkan jawm matsut shingbyi nga ai lam chye lu ai.