Shata 4 jan pat da hkrum ai Kamaing – Namya – Hpakant lam hpe Myen Hpyen dap ni August praw 2 ya shani kaw na gunrai htaw mawdaw n kau hpe lai na ahkang bai jaw dat sai lam chye lu ai.
Myen HPyen dap the Sam Hkyeng Pyithutsit dap ni up da ai Kamaing – Ma U Pin Shagyit hte Lawng Hkang Bawm Yam dap shara ni hta bai hpaw dat ya ai re lam, Hpakant ginra masha langai KNG shiga de n dai zawn tsun dan wa ai re.
“August praw 2 ya shani atsawm sha hpaw dat ya sai, Kamaing – Nam Ya Hpakant lam hpe, Kamaing Byuha kaw na mung a tsawm sha lai na matu ahkang jaw sai da. Dai hpe yu yang gaw, Myen hpyen dap maga na gaw, a tsawm sha hpaw ya sai ga rai nga ai.” Nga tsun dan wa ai re.
Hpakant de mung August praw lahkawng ya shana de hkying 2, hkying 3 ram kaw na U, Wa htaw ai mawdaw n kau ni shang taw sai hpe mu lu ai re.
KIA zing da ai Kamaing- Nam Ya – Nam Ting mare du hkra gaw, lai wa sai July 15 ya shani kaw na hpaw dat ya sai rai tim, Myen Hpyen dap maga na n hpaw ya wa hkraw ai gaw, n dai August praw lahkawng ya shani na gaw, a tsawm sha hpaw dat ya ai lam rai nga ai.
Ndai laman Hpakant lam hpe bai hpaw dat ya ai nga tim, Hpakant de hpyen masa matut shaja hkat taw nga ai majaw, galoi kaning rai bai pat kau ya wa na kun n chye ai nga, Hpakant ginra masha langai KNG de matut tsun wa ai re.
Hpakant de gunrai law malawng grai dum hprut wa ai majaw, n dai laman gunrai n kau hpe gan htaw shalai la shangun ai sha rai nna, gunrai htaw ra ai ni hpe bai htaw lahka ngut ai hpang gaw, lam bai pat wa na masa nga ai nga na mung tsun maram wa ai re.
Hpakant lam hpe lai wa sai April Shata Myen Hpyen dap ni htu shadut htim gasat lung wa ai hpang, KIA maga lam pat kau nna, Myen ni Hpakant du lung mat ai hpang, Myen ni lam bai pat wa ai mung rai nga ai.
Ya ten Hpakant lam mayan, Kamaing – Ma U Pin mare ni hta Myen hpyen dap the Sam Hkyeng Pyithutsit ni dung nna, Um Kahtawng kaw na, Gat Noi mare du hkra KIA ni Up madu da nna, Nam Ting kaw na Lawng Hkang du hkra Myen ni bai up madu da ai lam chye lu ai.