Manmaw Mare kaba hpe Wunpawng Mungdan Shanglawt Hpyendap KIA the pawng hpawm dap htim shagrawt nga ai hta Myawk dap (366) dap shara hte Kandaw Lay Hpaji jawng dap shara ni hpe bai htim gasat zing madu la lu ai lam Dukaba Nhpang Naw Bu tsun ai re.
Ndai laman Manmaw mare kaba hpe n’gun dat htim gasat nga ai hta Manmaw mare kata na Myawk dap masat (366) dap shara hte Kandaw Lay dap shara hpe February praw 2 ya shana maga de padang dip zing la lu ai lam Dukaba Nhpang Naw Bu Ndai zawn tsun dan wa ai re.
“Manmaw majan gaw, mani Manmaw myawk dap (366) hpe zing lu ai nga sha na ai, majan gaw shani shagu grau grau laja wa ai, anhte mung Ts.K.Hk (21) hpe n’gun dat gasat nga ai zawn, Tai hpyen maga na mung hpyen n’gun masha gau ngwi ngwi mahkawng wa na, majan laja taw nga ai,” nga tsun ai re.
Kandaw Lay Laika sharin jawng gaw, Myen hpyen dap Hk.L.Y (236) dap shara the ni ai rai nna, dai shara hta Myen hpyen dap maga na majan rai n byin shi ai ten kaw na Banger Gaduk shagreng na nga taw ai shara mung rai nga ai.
Myen hpyen dap maga na mung nbungli, Drone, Laknak kaba hpan hkum ni hte gap sharu bun nga ai majaw, majan ding yang naw matut laja taw nga ai lam Dukaba Naw Bu matut tsun ai re.
Manmaw Myen hpyen dap daju Ts.K.Hk 21 hpe htim gasat ai lam hta ram ram masan sa taw na, n dai laman gaw lu zing la wa na masa nga ai lam, shawng lam hpyen magam gun ni tsun ai re.
Mani hpawt February praw 2 ya jahpawt hta Myen hpyen dap hpe n-gun dat gap gasat nga ai hta Myen hpyen dap maga na marai 20 daram dawng hkawn hpraw sharawt na rim hkam wa ai lam the seng na, Dukaba Naw Bu hpe san yu yang “Teng n teng gaw n chye ai Social Media hta gaw mu ai, anhte hpe tara shang tsun shana wa ai lam gaw n nga ai,” nga na tsun ai re.
Mana de lu zing la ai myawk dap (366) gaw, lai wa bat mi jan daram kaw na lu zing sai lam mying pru taw ai rai tim, kaja wa ta tut hta, mana February 2 ya shana hkying (4:40) hta she tara shang lu zing ai nga Dukaba Naw Bu tsun ai re.
Ya ten Manmaw Ts.K.Hk 21 dap kata hta Myen hpyen dap maga Asuya magam gun nkau hpe hpyen ninggang shatai woi sharawng da ai lam ni mung nga ai hpe sagawn chye lu ai.