Kanpaiti mare hpe KIA htim gasat zing kau ai hpang, Myen hpyen dap ni Myitkyina Malihka mahkrai kaba pat
Kanpaiti mare kaba hpe KIA htim gasat zing madu kau hpang, Myen hpyen dap maga Myitkyina Mali Hka mahkrai kaba, Bala Min Htin mahkrai hpe dai hpawt manap hkying 7 ram kaw na pat kau ai nga ginra masha ni tsun ai re.
“Daihpawt hkying 7 ram kaw na pat kau ai, hpa majaw pat ai ngu ma n tsun ai, galoi du hkra pat na re ma n chye ai, Kanpaiti hpe zing kau sai re nga yang gaw ndai de hpyen masa bai n htuk wa na she n tsang i?” nga ginra masha langai KNG de tsun ai re.
Myen hpyen dap maga ya na zawn mahkrai kaba pat kau ai majaw mung shawa hkying lam hkawm sa hkawm wa hte galaw lu galaw sha lam ni hta yak hkak hkrum taw nga ai lam, Nawng hkying maga de nga ai hpyen yen mung shawa langai mung tsun ai re.
“Ya gaw anhte ndai mahkrai hku na sha lai na hkawm sa taw ai, mali hka jakli yawng mung pat ya mahkrai mung bai pat nga yang hkawm sa n mai mat sai, anhte hpyen yen ni gaw madung Myitkyina de na sha mari sha taw ai rai nga ai,” nga tsun ai re.
Waimaw Ginwang law malawng hpe KIA htim gasat zing madu kau ma ai hpang ya hpang jahtum Waimaw Hk.L.Y (58) dap sha ngam sai rai nna, dai shara de majan bai byin wa na hpe myit tsang ai majaw ya na zawn mahkrai pat kau ai masa mai byin ai nga mung shawa ni tsun maram taw ai re.
Kanpaiti mare kaba hpe KIA hte pawng hpawm dap maga November 20 ya shana htim gasat zing madu kau ai re.
