Majan byin nga ding yang, Nmawk Myen hpyendap hpe n tat sum kau hkra Myen hpyendap gaw, lani mi Jet nbungli 10 daram du hkra n hkring n sa wa htim gap bun nga ai lam chye lu ai.
Nmawk Myen hpyendap Hka.M.Y 437 dap hpe KIA hte pawng hpawm dap ni htim gasat nga ai , dai ni Aug shata praw 6 ya shani du hkra rai yang nhtoi 10 ya jan na wa sai re.
Myen hpyendap gaw Nmawk Myen hpyendap hpe n tat sum kauhkra, Jet nbungli hte shani shagu bawm wa sharu gap bun taw nga ai hpe KIA shawng lam hpyen shi sawk hte ni nawn ai mung masha langai KNG hpe tsun dan ai re.
“Nmawk majan masa lam gaw majan sawng yang sawng ai hku hpyen nbungli sa ai. Majan grai sawng ai shani hkan rai yang Jet nbungli 8 , 9, 10 ram sa ai. nhkring nsa nan wa gap bun ai. lani ni nlaw dik htum 4 hte 5 gaw ding yang wa gap ai” nga nna tsun dan ai re.
Nmawk majan hpe hpyen nbungli hte sha nrai, drone bawm ni hte mung laja lana gap bun nga ai zawn, hpyen n-gun 400 daram hte mung ninghkap gasat nga ai lam tsun dan ai re.
Dai majaw majan byin ai nhtoi 10 ya jan na wa sai raitim, Nmawk Myen hpyendap shara hpe shanglawt maga na lawan rai nlu zing la shi ai re.
Lai wa sai July shata htum wa maga, KIA dap ni Nmawk myen hpyen dap kata de lu shang nna, dap ka-ang hkup ram hpe lu zing da lu sai raitim , ya ten dap yawng hpe lu zing la na matu naw shakut nga ai masa kaw naw rai nga ai re.
Nmawk majan byin ai nhtoi shi ya laman hta Myen hpyen dap hte KIA dap lahkawng maga na si hkala , sum machyi ai lam law ai hpe mung matut chye lu ai re.
Ya na zawn, Myen hpyen dap maga na Nmawk ginra hpe hpyen nbungli ni hte laja lana htim gasat taw nga ai a majaw Nmawk ginra kaw nga ai mare kahtawng hkan na mung masha dum nta hten za ai lam grai byin nga sai hpe chye lu ai raitim, Phone Intetnet line ni nlu majaw tup hkrak chye lu na matu mung naw yak nga ai re.
Nmawk majan gaw dai Augst shata praw 6 ya shani hta mung dai hpawt daw hking 7 daram kaw nna, laja lana majan htim gasat taw nga ai re.
Myen hpyen dap gaw Nmawk Hka.M.Y 437 dap hpe hpyen n-gun law law hte laja lana htim gasat taw nga ai gaw la muga shara hta hkan nna, Nmawk ginra yawng hpe shanglawt zing madu kau na rai yang, Manmaw myo mare kaba hpe mung tat sum kau ra na masa re lam Jinghpaw mung masa masam maram ai Slg.langai tsun maram tawn ai re.
“Myen hpyen dap maga na Nmawk hpe tat sum kau wa na rai yang, Manmaw mare kaba hpe mung tat sum kau wa na re. dai majaw nlu nta byin mai ai ladat hte htim gasat taw ngu mu malu ai. Ndai myo mare kaba lahkawng hpe tat kau yang Manmaw hte Loije mawdaw lam kaba hpe du hkra shanglawt ni zing madu kau na ra ai . dai majaw Myen hpyen dap maga na loi loi hte sha gaw nkam tat na re”tsun ai re.
Nmawk mare kaba gaw Manmaw hte Loije mare sa ai mawdaw lam ntsa kaw nga ai mare kaba langai rai nna, Miwa mung jarit hku gun rai htaw ginlen ai , ahkyak dik ai shara langai mung rai nga ai re.
Hpyen masa lam hku nga yang, KIA hte pawm hpawm hpung ni Nmawk hpe lu zing madu la kau ai hte gaw Manmaw hte hpawn Miwa mung jarit gunrai htaw ginlen ai Loije mawdaw lam kaba hpe mung tat sum kau ra na masa kaw rai nga ai re.
Dai majaw Myen hpyen dap gaw Nmawk, Manmaw myo mare kaba ni hpe ntat sum kau hkra hpyen n-gun kaba hte makawp maga htim gasat nga ai re.
Nmawk Myen hpyen dap Hka.M.Y 437 dap kaba hpe KIA pawm hpawm dap ni gaw lai wa sai May shata ram kaw nna htim gasat wa ai hpang , majan shata mi jan gan hkring mat ai re.
Lai wa sai July shata 24 ya shani kaw nna, numdaw kalang mi bai htim gasat hpang wa ai re.
