Jinghpaw Mung sinna hkran, Naga ginra Nam Yun mare shang hkrai noi, hka kaba kaw yawng di lawm mat ai majaw, ginra masha ni hkawm sa hkawm wa lam hta yak hkak hkrum nga ai re.
Dai mahkrai gaw Nam Yun hte Shingbwi Yang mawdaw lam kaba ntsa hkrai noi langai rai nna, June shata marang ladu lai htu ai majaw, mawru hta yawng mat ai re.
“Mare shang wa mahkrai kaba n-nga mat sai majaw ginra masha ni hte hkrun lam hkawm mung masha ni hkawm sa hkawm wa lam hta grai yak hkak mat sai. yen ten mahkrai daw mat ai majaw mare pru shang galaw ai ni hpe hkali hte htaw la n-na sengke ni hte shalai la ai. sengke langai mi gaw mun ni jaw ra ai” nga nna asak 30 ning re Nam Yun ginra masha langai tsun ai re.
Dai majaw ginra masha ni gaw Jakli, sengke ni hte yak yak hkak hkak lai di nga ra ai hpe chyelu ai re.
Hka kaba ai kaw daw hten mat ai mahkrai gaw Taing Yawng hka mahkrai ngu ai rai nna, dai mahkrai gaw Nam Yun ginra hte Pang Sawng ginra ni hpe Danai , Shingbwi yang maga de na gunrai htaw shalai bang nga ai hte hkrun lam hkawm mung masha ni matu ahkyak dik ai mahkrai langai re lam ginra masha ni tsun ai re.
“Mahkrai daw mat ai shata mi ram du wa sai. Hka kaba ai mung nhkrat hkraw ai a majaw gram lajang mung nmai rai yak nga ai. Danai maga de na shang ai gun rai ni hpe madaw hte kalang bai htaw la ra ai. dai majaw ginra kaw gun rai manu ni mung tsaw ai hta grau n-na tsaw rawt taw nga ai” nga nna ginra masha langai matut tsun ai re.
Namyun mare shang wa mahkrai kaba daw hten taw nga ai majaw Danai maga de na htaw shang ai gunrai ni hpe mawdaw ni hte kalang bai htaw la ra nna ginra kata gunrai manu tsaw rawt ai shadang grau sawng wa ai hpe tsun dan ai re.
Lai wa sai June shata Nam Yun ginra hta hka kaba ai tsin yam hta ginra kata na mahkrai ni daw hten mat ai sha n-ga wan shadaw ni mung daw hten mat n-na mi hprap wa nlu ai shata jan rai wa sai hpe mung matut chye lu ai re.
Dai zawn sha Namyun mare lahta daw de nga ai, Pasawng ginra kata kaw mung ndai July shata praw kaw n-na marang ladu shalai htu kaba ai amajaw Namyun hte Pansawng lam lapran kaw ga gyi ru ai lam ni byin n-na ginra mung shawa ni hkawm sa lam yak nga ai hpe chye lu ai.
Dai majaw ya ten Nam Yun kaw nna Pansawng de sa na rai yang, sengke lam sha hkrang nna sha yak yak hkak hkak lai di hkawm sa nga ai re.
| ReplyForward |
