NUG asuya n pu PDF pawng hpawm dap ni kaw na, Mandalay htim gasat majan hpang taw sai lam, NUG asuya kaw na June 27 ya shani ndau da ai re.
Dai majan masing hpe Shan – Man majan masing ngu shamying ai hte June 25 ya shani kaw na htim gasat taw nga sai lam tsun da ai re.
Ndai majan masing hta Mandalay PDF, Mogok byuha dap dung masat (513), Kyauk Me dap pram hpung, Pyin Oo Lwin ပကဖ, Mogok ပကဖ, Mattaya ပကဖ, ning shang lawm ai hte, Rawt malan hpu nau Balawng TNLA dap ni hte pawng hpawm nna, Nawng Cho, Kyauk Me, Ti Paw, Mogok ginwang kata na Myen hpyen dap shara ni hpe htim gasat taw nga ai lam tsun n dau da ai re.
NUG asuya npu PDF dap ni kaw na, Nawng Cho Hk.M.Y (115), Mattaya ginwang na ပန်းသလဲ တောင် Myen hpyen dap, ကျောက်ကြမ်းတောင် dap, ရေစိုတောင် dap hte masat (606) amyawk dap kaba ni hpe htim gasat zing madu lu sai lam dai n dau laika hta matut tsun da ai re.
Mattaya ginwang na Hk.M.Y (114), Nbungli makawp dap (1014) အင်ကြင်းမြိုင် ni hpe tsep kawp zing madu la lu na matu, matut htim gasat taw nga ai lam chye lu ai.
Ya ten Mogok hte Kyauk Me muklum kata ni hpe rawt malan pawng hpawm dap hku na matut jawm htim gasat taw nga ai lam tsun da ai re.
Ndai laman lahta Sammung Nawng Cho, Kyauk Me, Ti Paw, Mogok, dap shara ni hpe Balawng TNLA hte PDF pawng hpawm dap ni htim gasat taw nga ai rai nna, lahkawng maga dap na laknak kaba gap shadam ai lam a majaw, mung shawa si hkala hkrum ai lam ni shani shagu byin taw nga ai re.
