Namhpakka majan a majaw, nta n lu mat sai mung mare masha ni a matu garum ningtum ra ahkyak taw nga ai lam chye lu ai
Ndai shata praw kaw na, Namhpakka Hpyen yen mung shawa ni, tinang mare buga de bai n htang wa taw sai rai tim, laknak kaba hte nbungli bawm a majaw dum n’ta yawng wan hkru hten mat sai hpyen yen mung shawa ni rawng na dum n’ta n lu mat ai majaw, hkyak hkyak garum ningtum ra taw nga ai lam, dai ginra na mung shawa langai KNG shiga dap de tsun dan wa ai re.
“Hpyenyen mung shawa ni mare de gaw lu wa sai, rawng na dum n’ta nlu mat ai ni grai law mat sai, dum n’ta bai gaw gap la na garum ningtum grai ra taw nga ga ai, ya yang gaw mai byin ai hku jinghku jingyu n’ta hkan mai byin ai hku machyu shingbyi na nga nga ma ai,” nga tsun ai re.
December 27 ya shani kaw na Namhpakka Myen hpyen dap hpe KIA dap htim gasat wa ai hta majan shata mi hkawt laja lana byin wa nna, laknak kaba si hte nbungli bawm a majaw mung shawa dum nta law law hten hkrum mat ai re.
Ya ten Namhpakka mare mung shawa ni tinang dum nta bai nhtang wa sai rai tim, dum n’ta law malawng wan hkru hten mat ai majaw, ya hkyak hkyak gan rawng shingbyi na dum n’ta ginsum gaw gap la na garum ningtum ra ahkyak taw nga ai lam, ndai zawn matut tsun ai re.
“Ya n’ta tsep kawp n lu mat sai ni gaw Hu Hpyet, Nam Um, Nam Gut, Hu Nawng mare hkan jinghku ni kaw hkan machyu taw nga ai, dai zawn nta n lu mat sai ni a matu gan mai shingbyi na zawn re dum n’ta lawan gaw gap la ra taw nga ai, ya gaw yawng yak ai ni hkrai re majaw kaning ndi mai byin ai hku lai di taw nga ga ai,” nga tsun ai re.
Namhpakka Majan ten dai mare na mung shawa nta 100 jan wan hkru hten mat nna, ya ten mare buga gaw sharawt ai lam hpe tinang ding hkrai mai byin ai hku na gaw gap la taw nga ai re.
Shata mi hkawt na ai Namhpakka majan hta mung shawa marai 30 hkawt asak si sum wa nna, hkala hkrum ai mung shawa ni a matu garum ningtum matut ra ahkyak taw nga ai re.
Ya ten Namhpakka mare bai gaw sharawt la lu na matu mung shawa yawng a garum ningtum lam ni ra ahkyak taw nga ai re.
