Putao ginra hta Tang Gu Tang woi awn ai Pyithutsit hpung ni kaw nna dum nta langai hpyen la n galaw n mai, hkan woi zinlum hkawm taw nga ai lam chye lu ai.
Pyithutsit hpyen la galaw na matu hkan woi zinlum ai hta, January shata kaw na Putao muklum ntsa na, Duktang lawk, lawu san gawng, lahta san gawng, Mungla Shidi mare ni hkan, nta langai hpang langai pru shang nna, hkan woi zinlum wa ai nga, Putao ginra masha langai KNG de ndai zawn tsun dan wa ai re.
“Lai wa sai ten mung hkan woi zinlum ai lam ni gaw nga wa ai, rai tim ya na zawn nta langai hpang langai pru shang nna hkan woi zinlum ai gaw n nga ga yu ai, dai hkan woi zinlum ai hta nta langai hpyenla langai n galaw n mai nga na gaw tsun ai, ya gaw rim hkra gaw rai n rai shi ai.” nga tsun ai re.
Tanggu Tang Pyithutsit hpung ni kaw na ya na zawn Myen hpyen dap hte pawng hpawm nna, Pyithutsit hkan woi zinlum nga ai hpe nra sharawng ai ramma law malawng gaw, myo mare kaba ni de htawt sit hprawng yen taw ai lam ni mung nga taw ai re hpe chye lu ai.
Ya na zawn nta di di hkan woi zinlum tim, pyithutsit de shang wa ai lam n nga ai rai yang, hpyen ladat hte hkan rim lahkawn wa na masa nga ai lam, ginra masha ni matut tsun dan ai re.
Ya na zawn hkan woi zinlum nna Pyithutsit dap de shang wa ai ni hpe du wa na March shata kaw na hpyen wunkat jaw mat wa na hkyen taw ai hpe chye lu ai.
Putao ginra hta ya ten Tang Gu Tang Rawang hpung ni hte, U Shwe Min Lisu Pyithutsit hpung lahkawng yan hpyen lahkawn taw nga ai re.