Putau hte Myitkyina Lapran Nbungli Pyen ai Alang Shayawm ai Majaw, Ginra Masha ni Yak Hkak Hkrum
Myitkyina, Putao lapran nbungli lung-yu alang hpe htam 2 shayawm kau ai majaw, hkrun lam hkawm mung mare masha ni yak hkak taw nga ai lam chye lu ai.
Putao hte Myitkyina lapran hkawm nga ai nbungli, Air Kanbawza, MAI ni gaw, shawoi bat mi hta 3 lang daram pyen ai rai tim, ndai hpang daw bat mi hta kalang sha pyen mat ai majaw, hkrun lam hkawm mung shawa ni yak hkak wa ai re nga Putao Kawng Kahtawng na Mung shawa langai KNG de tsun ai re.
“Lai sai ten gaw, bat masum ya shani, manga ya shani, kru shani hkawm ai, ndai bat gaw Air KBZ rai yang hpang na kru ya gaw Air Myanmar dai hku hkawm ai rai nga ai. dai kaw na ya gaw bat mi kalang sha rai mat sai, dai majaw December du hkra na nbungli lekmat nnga sai nga tsun ai,” nga tsun dan ai re.
Ya ten hkrun lam kalang hkawm na rai yang, nbungli lekmat shata mi tau hkrau la da ra ai lam matut tsun ai re.
Ya ten Myitkyina hte Putao lapran hkrun lam hkawm na matu, nbungli lekmat December shata du hkra na ma taw sai lam chye lu ai.
Putao Myitkyina nbungli lekmat lai wa sai 2022 ning hta marai langai Mun 5, Mun 6 daram sha nga ai rai tim, dai ning 2023 ning kaw na gaw marai langai Sen mi Mun matsat du hkra manu tsaw rawt mat ai lam chye lu ai.
Myen hpyen dap daru magam zing kau ai hpang, Myitkyina Putao lapran majan jahkring hkring byin wa ai hte, hpyen lahkawn ai lam ni a majaw, nbungli lam hku na sha hkawm law taw nga ai rai nga ai.
Ya na zawn nbungli hpe sha machyu let hkrun lam hkawm ra taw ai Putao ginra masha ni gaw, ya na zawn bat mi 3 lang hkawm taw ai kaw na, bat mi kalang sha byin mat ai majaw, lam shagu hta yak hkak wa taw nga ai re.
