Waimaw – Chihpwi lam, Sha-Ngaw mare makau hta, bungli galaw masha marai 35 htaw da ai, leng 10 mawdaw kaba galau ai majaw, masha marai 7 asak si sum nna, marai 9 hkala sawng ai lam, garum ningtum hpung ni kaw nna chye lu ai.
October 19 ya shani, Hopin kaw nna Hpi Maw lapran tsang jawng gap na matu lung wa ai ni, Sha-Ngaw mare makau hta mawdaw break baw nna galau ai majaw, si hkala hkrum wa ai re nga machyi masha ni hpe sa htaw la ai garum nintum hpung na lit nga ai salang langai KNG de ndai zawn tsun dan ai re.
“Mawdaw galau na dai shara hta nan si ai gaw marai 7 re. laga marai 9 gaw hkala sawng ai, Myitkyina tsi rung kaba de htaw sa da ai, ngam ai loi li hkala ai marai 20 jan hpe gaw, Waimaw tsi rung kaw re,” nga nna tsun dan ai re.
Dai mawdaw kaba hta marai 35 jawn lung wa ai kaw, La marai 6 hte Num langai dai shara hta nan asak si sum ai hte marai 9 hkala sawng nna, ngam ai marai 19 gaw loi li hkra machyi ai ram sha re nga matut tsun dan ai re.
Hkala sawng ai marai 9 hpe Myitkyina mung shawa tsi rung de sa da lu sai majaw, myit tsang n ra sai lam tsun ai re.
Ya ten dai mawdaw gau ai mawdaw la hpe Waimaw balik dap hta san jep taw nga ai rai nna, mawdaw galau ai gaw, Break baw nna, galau ai re nga tsun da ai re lam chye lu ai.
Jinghpaw mungdaw kata hta, Mawdaw sengke gau hkang ai lam tara n hkan ai majaw, mawdaw sengke adawt ai amu manghkang jahkring hkring byin nna, asak si sum ai lam ni mung ding yang byin nga ai re.