Mung chying mung shawa yawng hpyen masa sadi maja na lam hte seng na, Wunpawng Mungdan Shanglawt hpyen dap (KIA) sadi jaw n dau laika shabra tawn ai re.
Dai n dau shabra laika hta, Ya ten Myen hpyen dap gaw Wunpawng Mungdan kata de hpyen masing nga nga hte htim gasat taw nga ai aten, mung shawa hte hpung magam gun ni hpe du hkra Porter rim woi ai lam, masha ninggang shatai nna, shawng lam hkawm shangun ai lam, n tsen n hten ai ngu mara rim masu nna, du kadoi sat kau ai mabyin ni shara shagu hta mu lu ai lam, dai n dau laika hta tsun da ai re.
Gasat gala majan byin ai lam n nga tim, shan hte hpyen dap grup yin hte shan hte hkawm sa na hkrun lam ni de laknak kaba hkrup mara gap ai lam, mung shawa nga ai mare buga ni de shingte masat tawn nna hkrup mara gap bang ai majaw, mare kata mung shawa ni si hkala ai , mung shawa dum n ta Nawku jawng ni law law mung laknak kaba si ni hte n bungli bawm ni hkra nna hten run ai lam, byin nga ai lam matut tsun da ai re.
Dai majaw, Mungchying mung shawa yawng hpyen masa hpyen shiga ni dingyang madat maram nga ra ai hte hpyen wa a lata hta n rim hkrum hkra koi yen sadi na hte ra hkyak ai hta lai nna, hkrun lam hkawm ai lam , nam wam hkawm ai lam n galaw na matu tsun sadi jaw da ai re.
Amyu shayi hte kanu num ni mung tinang hkrai mare shinggan pru hkawm ai lam, dum n ta kaw tinang hkrai rawng nga ai lam sadi ra na hte koi yen n lu ai bungli lamang hta lai nna, mare buga kata masha hpawng de majaw nga ai lam shana aten lai hkra wam hkawm pyaw hkawm ai lam n galaw na matu tsun sadi jaw da ai re.
