Myen hpyen dap rim woi mat ai Hpakant lam mayan mung shawa marai 30 jan hpe, dai ni August 28 ya shani Namting mare hta yawng hpe bai dat ya sai lam chye lu ai.
Myen hpyen hpung ni gaw August 24 ya shana Namya mare kaw nna rim woi mat ai Mung shawa marai 30 jan hpe, hpyen ninggang shatai woi hkawm ai hta, Myen hpyen dap, dapnu 33 dazik kap ai hpyen palawng jahpun nna, laknak arung arai ni hpe gun shangun let nhtoi 4 ya na hkra woi hkawm nna, bai dat dat ya ai re lam, shawng lam magam gun ni kaw na chye lu ai re.
“Dai ni Namting mare kaw na yawng wa shangun sai da, ya du hkra gaw rai n du wa shi ai, anhte mung la nga ga ai, lam makau mare hkan na ni gaw wa sai zawn mung nga ma ai.” nga nna ginra masha langai tsun ai re.
Rim woi mat ai mung shawa ni hpe hpyen palawng jahpun nna, arai gun shangun ai lam hte seng nna, shawng lam magam gun langai mung n dai zawn matut tsun ai re.
“Myen hpyen dap ni rim woi lang ai mung shawa ni hpe ya gaw hpyen hking du hkra jahpun da ya ma ai. Mung shawa ni grai lawm ai majaw, anhte maga hku na gaw dai hku sha yu shalai kau dat ai ga rai nga, mani Gatnoi mare kaw jahkrit ai hku na loi gaw hkap gap dat ai le.” nga tsun dan ai re.
Ya ten dai Myen hpyen hpung ni gaw, Hpakant lam de ding yang matut lung wa taw ai rai nna, mung shawa ni hpe Namting mare du hkra hpyen ninggang shatai woi lang ai mung rai nga ai.
Myen hpyen dap ni htu shadut lung wa ai majaw, Hpakant lam hpe August 25 ya shani kaw na pat kau ai gaw, dai ni 28 ya shani hta bai hpaw dat ya sai rai nga ai.
Dai zawn Hpakant lam hpe pat kau ai majaw, Hpakant ginra de lu sha gun rai manu grai tsaw rawt mat ai sha n ga, mung mare masha ni hta yak hkak ai lam ni grai law wa ai re hpe chye lu ai.
Ya ten Hpakant lam de lung wa taw ai Myen hpyen dap ni gaw, lam ding yang mung mare masha ni hpe hpyen ninggang shatai woi lung wa nna, lam lapran shara lahkawng hta hkap gap gasat hkrum ai hta, si hkala ai lam ni nga wa ai re.
