Mogaung mare kata, Myen hpyen mawdaw gap hkrum ai hpang kaw nna, Pyithutsit hte Myen hpyen hpung ni, laja lana rim jep ai hta mung masha marai 4 rim hkrum da ai lam chye lu ai.
August 19 ya shana maga Myen hpyen mawdaw gap hkrum ai hta, dai mawdaw kaw lawm ai marai 2 si ai hpang, ya na zawn mare kata laja lana san jep ai lam ni galaw wa ai nga, dai ginra na mung shawa langai KNG shiga dap de tsun dan ai re.
“Hpyen mawdaw gap hkrum ai kaw na, Myen hpyen dap hte Pyithutsit pawng hpawm nna, shara shagu hta grai san jep ma ai. lam kaw san jep ai sha n ga, shan hte n tsen ai n ta hkan mung shang jep hkawm ma ai. ya du hkra rai yang gaw, marai 4 ram hpe rim da ai nga na lu ai.” Nga nna Mogaung mung masha langai tsun ai re.
Ya rim woi hkrum ai marai 4 gaw, asak 20 ning jan re ai ramma ni hkrai rai nna, Mogaung Uthan lawk hta August 20 ya shana Myen hpyen dap ni sa rim woi mat ai re lam chye lu ai.
Ya ten Mogaung hta hkawm sa hkawm wa mung mare masha ni a Phone, Sengke Toolbox hte mawdaw shingdu yawng hkan sawk jep ai lam ni galaw nga nna, shan hte n tsen n hten ai ni hpe shaga la hkra rai na san jep ai lam ni nga taw ai hpe chye lu ai.
Myen hpyen dap ni kaw na ya na zawn, ladu lai san jep ai lam ni a majaw, mung mare masha ni shinggan de pru hkawm na matu myit tsang nga ma ai re.
