Kamaing kaw nna mung shawa marai 5 hpe rim woi let hpyen ninggan shatai nna pru mat wa ai Myen hpyendap hpe Wunpawng Mungdan Shanglawt hpyen dap KIA Dung 44 ni, Nlung Dup mare makau hta hkap gasat ai lam chye lu ai.
August 22 ya jahpawt jau hkying 2 daram aten, Kamaing mung shawa marai 5 hpe n ta yup taw ai kaw na sa jasu rim woi la nna, Hpakant lam de hpyen htu shadut ai hta hpyen ninggang hku na rim woi mat ai re lam Kamaing mare na mung shawa langai KNG shiga dap de ya na zawn tsun dan ai re.
“dai hpawt maga hkying 2 ram hta n ta kaw na sa jasu rim woi mat ai da, marai 5 re nga tsun ai. dai Myen hpyen hpung ni gaw mani shawng shani Danai lido lam maga de na shang wa ai Myen hpyen hpung ni re nga tsun ai” nga nna tsun dan ai re.
Kamaing kaw na hpyen n gun 100 daram hte lung wa ai Myen hpyen hpung ni gaw, Hpakant maga de lung wa ai lam ding yang sinat kaji kaba gap let lai lung wa ai ten, Ma U Pin mare lai, Nlung Dup hta hkap gasat hkrum ai re lam chye lu ai.
Dai hkap gasat hkrum ai hta, Myen hpyen dap maga si hkala sum machyi ai lam nga ai rai nna, dai si hkala ai ni hpe Kamaing de htaw yu mat ai lam shawng lam hpyen shi sawk ni tsun dan ai re.
Dai Myen hpyen hpung ni gaw, August 17 ya shani Mogaung kaw nna Mawdaw kaba 3 hte Dumbung mare du hkra wa htaw sa kau da nna, Dumbung mare du ai hpang shani (August 18) ya shani dai mare na mung shawa marai 5 hpe rim woi la nna, hpyen ninggang shatai let, Kamaing mare du hkra wa sa shangun na, Kamaing du ai hpang, dai mung shawa marai 5 hpe bai dat ya ai lam chye lu ai.
Matut na raitim, dai Myen hpyen hpung ni gaw, Kamaing mare hta 2 na wa hkring la nna, August 22 ya jahpawt jau, hpyen shamu shamawt hkawm sa wa ai ten, dai mare na mung shawa marai 5 hpe hpyen ninggang shatai na matu rim woi lang nna, hkawm sa wa ai ten hkap gap gasat hkrum ai rai nga ai.
Dai Myen hpyen hpung ni gaw, Hpakant lam Senghpra, Hkumtsai zup, Hkrairun, gat noi mare ni hta wa du shara jahkrat na hkyen nga ai hpyen hpung ni re lam chye lu ai.
Myen hpyen dap ni ya na zawn, hpyen n gun hte htu shadut taw nga ai majaw, dai ginra mayan hta majan kaba byin wa na hpe ginra masha ni myit tsang nga ma ai re.
