Kutkai, Namhpakka Lapran Myen Hpyendap Hpe KIA Hkap Gasat
![](https://kachin.kachinnews.com/wp-content/uploads/2023/08/363574483_1348935125999340_4024548522260788322_n-780x470.webp)
Mungmyit Sinli, Kutkai hte Namhpakka lapran shara 2 hta Myen hpyen dap hte KIA dap lapran, August 17 ya shani majan byin ai lam chye lu ai.
Kuthkai kaw nna Muse de lai lung wa ai Myen hpyen dap n-gun 200 daram lawm ai hpyen hpung ni hpe, Manlung hte Namhkrai shara lahkawng hta KIA dung 9 ni hkap gasat ai re lam, dai ginra na mung shawa ni KNG shiga dap hpe tsun dan ai re.
“Kuthkai maga de na Myen hpyen dap ni lagaw hte mung, mawdaw hte mung htu lung wa ai, ya dai hpyen hpung ni hpe hkap gap ai ga rai nga ai. ya du hkra laknak ngoi ding yang re.” nga nna ginra masha langai tsun ai re.
Namhkrai Myen hpyen dap hpe sa htim gap gasat taw ai majaw, Namhpakka Hk.L.Y (123) dap na laknak kaba ni hte gap garum taw ai re lam chye lu ai.
Myen hpyen dap ni August 16 ya shani Lashio kaw nna mawdaw kaba 50 daram hte lung wa ai gaw, Wa mung maga de law malawng shang mat nna, n kau Muse lam maga de htu shadut lung wa ai rai nga ai.
Dai hpang, Kuthkai kaw nna Muse de lung wa ai Myen hpyen dap hpyen n-gun 200 daram gaw, lagaw lam hpyen mawdaw, mung shawa gun rai htaw mawdaw, ni hte lung wa taw ai lam rai nga ai.
Myen hpyendap ni gaw, Mungmyit Sinli ginra de hpyen htu shadut shamu shamawt ai lam ding yang galaw nga ai rai nna, lam lapran hta jahkring hkring gap gasat hkrum nga ai re.
Ya ten Myen hpyen dap gaw, mungdan ting, shara shagu ngu na de hpyen n gun htu shadut shamu shamawt nga ai hta, PDF hte ding yang gap gasat hkat taw nga ai re.