Katsu mare hta hprawng shingbyi nga ai, Namsan hpyen yen ni gaw, majan masa grau kahtet wa ai majaw, Myitkyina mare kaba de bai htawt hprawng yen na matu hkyen shajin taw nga ai lam chye lu ai.
Myitkyina-Manmaw lam kaba ntsa Gara, Katsu, Dabak, Japu, Mali mare ni de Myen hpyen dap ni n dai laman hpyen n gun grau grau jat bang taw nga ai hte rau, majan shani shagu ngu na byin taw ai majaw, bai htawt sit na myit daw dan ai lam, Sama ginwang rung hta wa du hprawng yen nga ai Namsan hpyen yen mung shawa langai KNG hpe tsun dan ai re.
“masa gaw ngoi ding yang rai nga ai, ya Katsu kaw nga ai ni gaw htawt mung htawt mayu ai, rai tim mung ginwang ni matsun ai hpe naw la yu ga nga ai. Ndai Dabak, Katsu, Gara ni mung bai n yen, katsu ni chyawm n kau gaw rai ni bai htaw taw sai. Katsu gaw Myen hpyen dap hte rau yep re nga yang gaw Sitjawng grai law hkra wa nna, dai Katsu hta wa hkring re mu yang gaw hkrit ai ga rai nga ai.” nga nna tsun dan ai re.
Katsu ginwang rung hta machyu nga ai Namsan yang htinggaw (19) hte masha yawng 50 jan gaw, Myitkyina, Waimaw, gara hpyen yen dabang hta mung, mying jahpan n lawm sai majaw, gara de kaning rai hprawng yen ra na hpe nchye nna, yak hkak taw nga ai lam chye lu ai.
Dai hpyen yen mung shawa ni gaw, ya ten Myitkyina Waimaw de rai n lu htaw sit shi ai laman, KBC HDD kaw na htinggaw mi hpe Mun 3 garum ai hte lai di taw nga ai re.
Ya ten dai hpyen yen ni gaw, Sama ginwang rung gawk nu byilat ni hta sha, yawng jawm machyu nga ai majaw, machyi makaw lam ni byin law taw nga ai lam chye lu ai.
“Namsan yang de, matut manoi htu shadut taw ai hpe yu yang, aten na na masa re. Myen hpyendap a masing chyawm gara hku kun n chye ai. shata kaba na na kun? Anhte mare masha ni gaw dum n ta wa nga taw sai gaw raitim, mare bai n byin mat na mung bai tsang taw ai. myen hpyendap ni shawnglam de hkrat sum machyi law jang, anhte mare masha ni hpe zingri wa na mung tsang ra. Ya gaw tsang ra taw ai masa kaw gaw rai taw ai ka rai nga ai.” nga nna, Katsu mare masha langai mung tsun ai re.
Lai wa sai July praw 3 ya shani kaw nna, Namsan Yang ginra de myen hpyendap hte Wunpawng mungdan shanglawt hpyendap KIA lapran, majan laja wa ai majaw, Namsan Yang mare masha ni gaw Myitkyina, Waimaw, Laiza mare kaba ni de hprawng yen ai ni nga ai zawn, Katsu mare hta mung wa hprawng yen nga ai re.
Ya ten dai ginra hta Myen hpyen dap ni hpyen n gun shani shagu jat bang nga ai sha n-ga, laknak kaba ni ding yang ngoi taw ai majaw, Gara, Katsu, Dabak mare hkan na mung mare masha ni mung hkrit tsang nga ma ai re.
