Shwegu sinpraw dingda maga NUG Asuya jawng hta hpaji sharin nga ai hpyen yen jawngma ni a matu garum ntum ra kadawn nga ai lam chye lu ai
Ya ten jawng hpaw taw sai raitim, Shwegu mare kaba sinpraw hkran na, wan nat hkrum da ai mare 12 na mung masha ni gaw, ma ni a matu hpaji jawng hta jai lang arung arai ni hpe nlu mari shi ai majaw, garum ntum ra nga ai lam NUG Asuya a Shwegu ginra, Hpaji Du langai KNG de tsun ai.
“Yakhkak ai lam gaw wan kaw lawm mat ai jawngma ni a jawng lang arung arai ni rai nga ai nhpye, sharin laika buk, laika ka buk, bill pen hte laika sharin ai kaw lang ai arung arai ni ra nga ai re” nga na lahta na Hpaji Du kawn tsun ai.
Dai mare kahtawng 12 hpe Myen hpyendap ni gaw lai wa sai March shata hta hpyen hpung n’gun kaba hte htu shadut shang wa nna, mare ni hpe wan nat jahten kau ya ai majaw, ginra masha 8000 jan wan hpyen hkrum nna, mungshawa 10,000 jan hpyen koi yen nga ai kaw na ya mare de bai wa nga ai shaloi ma ni hpe laika sharin shangun ai ten, grai yak hkak ai lam NUG jawng kaw lung nga ai jawngma kanu kawa langai mung, KNG hpe ya na zawn tsun ai.
“tam la ra ai re. laika ka buk, bill pen, nhpye ni nkau gaw nlu tam la ai majaw, nlu lung mat ai ni mung nga ai re. Lu ai arung arai ni mung wan kaw yawng lawm mat ai majaw, lani mi tam lani mi sha rai nna, n’ta na matu mung galaw mayu, ma ni a hpaji lam mung galaw mayu, hkamja lam a matu mung hpan hkum re. Laika ka buk 1 hpe 900 re. Sharin laika buk gaw 13,000 nga ai re. Gara hku mung nchye tsun mat sai. Tsun yang mung myit kaji wa ai re hpaji lam kaw mung” nga na jawngma kanu kawa langai tsun ai.
2021-2022 ning hta NUG Asuya jawng hta hpaji sharin hkamla ai jawngma yawng marai 8,000 jan nga nna, Shwegu myo sinpraw hkran de na jawngma ni grau law ai lam chye lu ai. Jawngma ni gaw laika buk, nhpye, laika ka ai arung arai ni nlu ai majaw, jawng nlu lung ai lam chye lu ai.
Shwegu mare kata, 2021-2022 ning hta NUG asuya kawn hpaji jawng 30 jan lu hpaw ai raitim, dai ning gaw jawng 13 sha lu hpaw ai re. Dai lu hpaw da ai jawng ni hpe mung March shata Myen hpyen dap ni htu shang wa ai majaw, yawng pat da ra nna, May 20 ya shani kaw na jawng 8 hpe bai lu hpaw la sai hte ngam ai jawng ni hpe mung lu hpaw la na matu shakut nga ai hpe chye lu ai.
