Shiga

KIA D36 ginra hta Myen asuya dap hte matut gap hkat

Lahta Sammung KIA Dapdung 36, Kyukok (Pangsai) ginra hta, Myen asuya dap hte gap hkat ai lam, Sep. 14, bat Langai Ya shani matut byin ai re.

‘Ginra jasan’ masing hte shamu shamawt hkawm ai Myen hpyen hpung hte, bat Langai Ya shani KIA Dapba (6), D36 hte shawng aten kadun gap hkat nna, dai hpang KIA jinghku dap, Kokang MNDAA hte Rahkai AA pawng hpawm dap ni hte bai matut manoi gap hkat wa ai rai nga ai.

“Myen mung nayi hkying 1:45 pm kaw na Hpun Pyen Yang de KIA 36 MHH ni, dapdung langai mi nga ai kaw, Mungli maga hku lung wa ai Myen hpyen hpung ni hte gasat poi bai byin taw nga ai,” nga nna buga masha langai tsun ai.

D36 ginra Kai Dwi Kawng hta, KIA shanglawm ai Dingdung Daw Daphpawm na MNDAA hte AA ni sha n ga, Sam hpyen dingdung-dingda SSPP/SSA hte RCSS, ni mung nga ai lam chye lu ai.  Dai ginra de tatmadaw Myen hpyendap tat-ma (88) hte tat-ma (99) hpyen hpung ni, shara masum daram kaw nna wa wang htu shang wa ai majaw, September 11 kaw nna gasat gala majan byin ai re.

KIA D36 ni gaw Ting Sa Kawng maga san san nga ai rai nna dai shara makau, Man Kawng mare makau kaw Myen hpyen hpung hte Sep. 12 hta aten kadun gasat gala majan byin ai lam nga ai re.

Myen hte rawt malan hpung ni a gasat poi hpang wa ai, bat Manga Ya jahpawt kaw nna masha 300 hkawt nga ai Man Kawng mare masha yawng gaw ni kahtet ai Man Pying mare de hprawng yen nga ai re.

Lama na gasat gala majan galu wa yang gaw hpyen yen ni malu masha hte tsi mawan garum ntum ra na re nga, Man Kawng mare salang wa tsun ai re.

Myen hpyendap gaw dinghkrai majan jahkring ai ladaw ndai September shata mi bai jat da ten, Lahta Sammung e amyusha rawt malan hpung ni hpe jahte tam htu gasat ai lam ni galaw nga ai re.

DDD hpung mali, MNDAA, AA, KIA hte Balawng TNLA ni gaw bilateral gap hkat jahkring galaw mayu ai raitim, Slgj. Awng San Suu Kyi a NLD asuya hte tatmadaw Myen hpyendap lapran, n hkrum n ra manaw shai hkat ai majaw, n lu jahkrup yak hkak nga ai masa re nga, Myitkyina daju simsa lam akyu galaw hpung, PCG (Peace-talk Creation Group) na Duwa Lamai Gum Ja tsun wa ai re.

Related Articles

Leave a Reply

Your email address will not be published. Required fields are marked *

Back to top button