ShigaSimsa lam

Hpyen yen dum nta wa na matu Miwa asuya Yuan wan 4 garum

Jinghpaw Hpyen yen ni dum nta bai wa ai hta jai lang na matu Miwa Gumsan asuya gaw Yuan wan 200 garum na daw dan da ai rai nna, dai hta wan 4 hpe gaw August praw 5 ya shani Myen asuya hpang de shalai ya sai re.

Shawng ningnan garum ya ai wan 4 hpe, Jinghpaw mungdaw kata Tar Law Gyi, Dabak mare hte Nam San mare ni hta dum nta 191 hpe gaw gap mat na re nga nna Naypyitaw Munghpawm Asuya Garum Gahtau hte Shara Bai Jahkrat hkringmang dap kawn tsun da ai re.

Ya na zawn miwa asuya a garum gumhpraw hte dum nta bai wa na mare ni hpe lata ai lamang hte seng nna nchye lawm ai lam, Jinghpaw Hpyen yen lakawn lanawn Hpung KHCC ningbaw Rev.Dr. Hkalam Samson tsun ai re.

Miwa asuya gaw Myen mung a simsa lam, Jinghpaw mungdaw a hpyen yen ni dum nta bai wa na lamang hta garum na lam Miwa gumsan magam rung kaw nna mung ndau da ai re.

Jinghpaw mungdaw kata asuya dap hte Wunpawng mungdan shanglawt hpyendap KIA lapran gap hkat jahkring lekmat htu da ai lam nnga ai majaw, dum nta wa na hpyen yen ni hta shimlam hte seng nna myit tsang nga ma ai re.

Related Articles

Leave a Reply

Your email address will not be published. Required fields are marked *

Back to top button