Asuya saw shaga yang KIO mung FPNCC masing hte Nay Pyi Daw zuphpawng de sa na

Du na tsaban 21 Panglong zuphpawng de asuya saw shaga ai rai yang, Wunpawng Mungdan Shanglawt Hpung KIO mung FPNCC masing kata shang lawm na re lam KIO maga tsun ai re.

Raitim ya du hkra gaw asuya a tara shang saw shaga ai lam ndu shi ai nga nna Laiza KIO ginjaw na Du Kaba Nhpang Naw Bu tsun ai re.

“KIO hpe saw shaga yang gaw KIO mung FPNCC a malawm kata hku na sa wa na re. Saw shaga jang gaw KIO ginjaw komiti gaw shanhte a saw shaga ai laika hpe sung sung li li myit nna she dawdan na mara ai. Sa yang mai na nmai na, manu na nmanu na ngu ai hpe atsawm myit dinglik yu nna she daw dan na mai” nga nna tsun ai re.

Tsaban 21 Panglong zuphpawng hpe August 12-14 lapran 3 ya tup Nay Pyi Daw e galaw na rai nna, ndai kalang gaw covid-19 kap bra ana a majaw masha n-gun loi shayawm na re lam chye lu ai.

Lahta Myen mung dap hpawm malawm Kokang MNDAA, Ta-ang TNLA hte Rakhine AA marai 3 chyawm gaw asuya hku nna shimlam hpe lit la ya ai rai yang FPNCC masing hte zuphpawng sa shanglawm na lam chye lu ai.

NLD asuya lakhtak hpang jahtum galaw ai ndai 4 lang ngu na Panglong zuphpawng gaw ra lata poi du na mahka galaw ai re majaw, NLD asuya hku nna mungmasa akyu a matu yaw shada ai lam mai byin ai nga nna mung masa maram dinglik nga ai Slg. Nhkum Lasang Awng tsun ai re.

Lahta Myen mung daphpawm simsa lam bawngban wuhpung rai nga ai FPNCC hta Wa mung hpyendap UWSA, Mungla NDAA, Kokang MNDAA, Wunpawng Mungdan Shanglawt Hpyendap KIA, Sammung dingdung daw hpyendap SSPP/SSA, Ta-ang hpyendap TNLA hte Rakhine Dap AA ni shang lawm ai re.

0 Reviews

Write a Review

Read Previous

Hpakan lam gram galaw na matu mungdaw asuya hta ahkang n-nga

Read Next

Mu Nyin hte Manmaw ginwang ginjaw kata shingjawng na KSPP dat kasa ni

Leave a Reply

Your email address will not be published. Required fields are marked *