ShigaSimsa lam

AA rawt malan hpung hpe matut nna shiga shapraw ai shiga dap lit hkam ni hpe ahkyak la

Rakhine Hpyendap AA hte matut mahkai nna shiga ka shapraw ai shiga dap 2 hpe gasu gabrawng byin shangun ai tara upadi hte ahkyak la da ai lam chye lu ai.

Mandalay daju Voice of Myanmar VOM shiga dap hte Rakhine daju Narinjara shiga dap lit hkam ni hpe gasu gabrawng upadi 50(a), 52(a) ni hte ahkyak la da ai re.

Rakhine rawt malan hpyendap AA hpe gasu gabrawng wuhpung hku nna masat ai lam March 23 ya shani mungdan asuya nan ndau ai re.

Dai hpang AA hpyendu hpe matut nna shiga ka shapraw dat ai VOM shiga dap madu Editor Slg. Nay Myo Lin hpe ya yang Mandalay e rim da sai lam chye lu ai.

Bai nna Rakhine daju Narinjara, Development Media Group DMG, Mandalay Indepth News hte VOM shiga dap shiga ni hpe Myen asuya MPT, Mytel internet line hte nmai shang hti hkra hkum pat da ai hpe mung chye lu ai.

Ya na zawn, Shiga dap 2 na Editor Chief marai 2 hpe gasu gabrawng tara upadi hte ahkyak la da ai ntsa Myanmar Press Council hku nna Myen hpyendap de san yu yang, shanhte nre ai sha, Pyi The Yay kaw nna tara jewat da ai re lam tsun da ai re.

Gasu gabrawng wuhpung ngu masat hkrum ai Rakhine rawt malan hpung AA hpe laiza e ntawn na matu lai wa sai bat laman Myen hpyendap gaw Wunpawng Mungdan Shanglawt Hpung KIO hpang de PCG kawn tsun shana shangun ai lam chye lu ai.

 

Related Articles

Leave a Reply

Your email address will not be published. Required fields are marked *

Back to top button