Htai nga Jinghpaw amyu sha ni Hkaw Hkam Jan a shangai nhtoi masat hpun bawng 900 jan hkai

Kachin-hill-tribes-at-Htam-Ngop-Majoi

Htai mungdan dingdung daw Chingmai Ginwang e shanu nga ai Jinghpaw wunpawng amyu sha ni gaw August 12 ya shani ang ai Htai hkaw Hkam Jan a shangai nhtoi hpe hpun bawng 900 hkai ai lamang hte masat masa shagrau wa sai re.

Htai hkaw hkam RAMA (9) gaw de da ai Ban Mai Samakee mare e shanu nga ai amyu sha ni gaw lai wa sai 1965 kaw nna 1975 du hkra Wunpawng Mungdan Shanglawt Hpyendap KIA dap jahkrat nga lai wa sai Htam Ngop Bum e hkaw hkam jan a shangai nhtoi masat hpung hkai lamang galaw ai rai nga ai.

“hkungga ai Hkaw Hkaw hte Hkaw Hkam Jan hpe chyeju dum ai lam, grai gahtet ai ginra kaw nna gatsi ai shara de du wa nna anhte hpe nga shara lajang ya ai. Lai wa sai GOC naw nga ai ten kaw nna Htai mung e shingbyi na ahkang lu ai. Htai Hkaw Hkam hte asuya ni gaw anhte hpe hkap tau la ai” nga nna GOC Lahtaw Zau Seng lak htak hpyenla dingsa hte ya Ban mai Samakee mare masha Slg. Kareng Hkawng Hawng Jinghpaw Shiga Dap KNG de ndai zawn tsun ai re.

1976 ning hpang daw ginra shagu de chyam bra mat ai Jinghpaw amyu sha ni chyawm shingbyi nga ai dai mare de 1982 ning February 13 ya shani Htai Hkaw Hkam Rama (9) Bhumibol Adulyadej hte Hkaw Hkawm shayi Sirindhorn sa du nna Ban Mai Samakee mare hpe Jinghpaw gahtawng ngu tara shang masat ya wa ai re.

Laban shani galaw ai ‘Htam Ngop Majoi’ hpun hkai lamang de Htai Royal Project mu gun salang ni, Hkaw Hkam hkaw hpyenla ni, Htai namkawn salang ni, Sinjai Miwa amyu sha ni hte Htai du KIA hpyenla dingsa ni shanglawm wa ai re.

1979-1980 Htai mungdan kata Communist ninghkap shingla gasat majan ni hta Jinghpaw KIA hpyenla ni hku nna Htai asuya hpyendap maga shanglawm garum wa sai lam dai gasat poi hta shanglawm ai Slg. Hkawng Hawng tsun ai re.

0 Reviews

Write a Review

Read Previous

Jinghpaw Ramma ningbaw 2 tara jewat da hkrum ai amu sakse ni hpe matut jep

Read Next

US Hpyendap gaw masha n shading gap ra ai AI myawk si gin shalat nga

Leave a Reply

Your email address will not be published. Required fields are marked *