Tag Archives: KDA

Covid-19 ladaw, Myen hpyendap gaw Kokang hpe sa htim gasat

Mungkan ting Covid-19, Wuhan virus ana zinli makawp ninghkap nga ten, Myen asuya dap gaw Lahta Sammung, Kokang dap hpe April 15, bat Masum Ya shani, sa htim gap ai majaw laja lana gasat gala majan byin wa sai re.

Kutkai ginwang kata Kawnghka Pyitusit snr KDA (Kachin Defense Army) a Dapba (2) ginra, Ja Yang kaw shara la tawn ai, Kokang Hpyendap (Myanmar National Democratic Alliance Army) Dapba (221) npu Dapdung (204) hpe Myen hpyen hpung lahkawng hte wa gap gasat ai lam re.

“KDA ni a ginra kata kaw Ja Yang hte Kawnghka lapran na Mung Yaw nga ai dai kaw, Kokang ni hpyendap jahkrat tawn da ai, shara la tawn da ai kaw Myen ni tat-yin lahkawng wa htim gasat ai kaw tsawm ra mi laja lana gasat poi byin ma ai. Jahtum e Myen ni bai htingnut mat ai,” nga nna buga masha langai tsun ai.

MNDAA Dapdung (204) na Dap Ran Up langai hkrat sum ai lam, shi tsun ai re.

Lahta Sammung e April shata htum hkra, shata mi bai jat, ‘dinghkrai majan jahkring da ai lam’ hpe Dingdung Daw Daphpawm hpung masum rai nga ai, Kokang MNDAA, Balawng TNLA hte Rahkai AA, ni ndau tawn ai ten, ya na zawn Kokang hpe sa htim gap ai lam mung rai nga ai.

Ya ten gasat gala majan ni gaw mungdan a sinna maga Rahkai mung dingdung daw de mung Myen asuya dap hte AA lapran laja lana byin nga ai re.

Myen asuya gaw AA hpe ‘ningchyun shanang jahten sharun hpung (terrorist)’ ngu March 23 ya shani masat ndau dat ai re. Dai zawn n ndau shi yang, AA ni nga ai Jinghpaw Mungdaw, KIO ginra Laiza hte Mai Ja Yang mare lahkawng mung gasat hkrum re lam hpe Myitkyina daju Myen hpyendap Dingdung Daw Daju (M.P.Hk) taimu, Maj-Gen Tayza Kyaw gaw March 20 ya shani PCG simsa lam akyu galaw hpung hpe shaga nhtawm, KIO ginjaw hpe sadi jaw ai lam galaw masai.

AA hpe ‘terrorist’ ngu masat ai hpe n hkapla ai hte manghkang hpe hpyen masa hte mahtai tam na shakut ai gaw ‘jaw ai ladat n re lam’ KIO ginjaw gaw March 26 ya shani Myen hpyendap M.P.Hk de htang shana dat ai lam, KIO Shiga Magam Dap lithkam, Du Kaba Nhpang Naw Bu tsun ai re.

Asuya gaw mungdan kata Covid-19 ana zinli chyam bra lam shayawm kau lu hkra, maigan manam ni hpe n jashawn ai mungdan chyinghka pat ai lam (lockdown) hpe April 30 du hkra galaw tawn ai re.

Mungkan ting, ya ndai chyam bra loi ai sin wawp hte seng ai Covid-19 coronavirus ana zinli hpe makawp ninghkap nga ten, mungdan shagu tinang hte seng ai majan ni gan jahkring tawn na matu, Mungkan Wunpawng Hpung (UN) a Amu Madu Daju Slg. Antonio Guterres hku nna lajin tawn ai re.

Kani manghkang hta, KDA ginjaw hte ningbaw ni hpe Myen ni zing

Ndai shata praw de, KDA ginjaw Kawnghka grupyin kaw na kani tsi hkyep hte kani galaw jak ni manu mana lu rim kau dat ai hpang, Myen hpyendap gaw hpyen n-gun kaba hte KDA ginjaw hpe sa wang zing nhtawm salang ni hpe rim tawn sai lam, ginra masha ni hku chye lu ai.

Lahta Sammung, Kutkai a sinpraw maga Kawnghka Pyitusit (KDA) ginjaw hte Loi Hkang Dapba (1) hpyendap hpe Myen hpyendap Tat-ma (99) ni sa wang zing nhtawm, KDA ginjaw salang ni hte laknak ni yawng rim zing kau sai re nga, buga masha langai ndai zawn tsun ai.

“Shanhte (Myen hpyendap) na gaw KDA hpe jahten kau mayu ai masa rai sai.  Dapba (1) hpe daini (March 25) gaw wang tawn da nna hpyendap laknak ni yawng zing la kau sai da. Salang ni hpe mung tsawm ra mi rim la, dai zawn byin mat sai hku rai nga ai.  Dai majaw, ya Loi Hkang, Kawnghka grup yin de mungshawa ni hpe nhku na n pru na matu, KDA ni hpe dazik n shakap na, hpyen hkying n lang sana hku matsun sai da. Dai hpe yu yang jahten kau sai rai nga ai.”

March 24 ya shani kaw nna KDA ginjaw Kawnghka hte Dapba (1) hpyendap Loi Hkang hpe Tat-ma 99 hpyen hpung ni wang tawn re lam, ginra masha ni tsun ai re.

Myen hpyendap ni gaw matut nna Wa Mung hte jarit ai KDA Dapba (2) ginra Ja Yang de hkan wang hkawm ai kaw, March 26, bat Mali Ya shani, Kokang MNDAA Dapba 211 npu Dapdung 204 hte shani pyen 1pm jan kaw nna shana jan shang ten du hkra, laja lana gasat poi byin ai nga, dai ginra masha ni tsun ai re.

Dai majan hta KDA ni Kokang maga lawm n lawm n chye lu tim Ja Yang de n lung wa na matu gaw Myen hpe KDA ni sadi jaw tawn ai lam nga ai hpe sagawn chye lu ai.

Myen hpyendap gaw Kawnghka grupyin na lu rim ai, Myen kyat billion 91 (US dollar wan $64) jan manu nga ai, kani nanghpam tsi hkyep ni hte dai nanghpam jep chyam galaw shachyaw ai arung arai ni hpe madun dan ai shiga sanglang hpawng hpe March praw 6 hta Loi Hkang kaw galaw ai re.

Dai lamang de maigan sumtsan salang rung Hpyen Dat Kasa ni, mungdan gadaga kani nanghpam pat jasan hpung ni hte shi htawn ni hpe Myen hpyendap helicopter ni hte sa woi madun sai rai nga ai.

Sa du ai maigan dat kasa ni kaw, US kaw na the United States Drug Enforcement Administration, Htai na Thailand’s Office of the Narcotics Control Board, Miwa na China’s Natoinal Narcotics Control Commission hte Australia na Australia Federal Police ni lawm ai re.

1991 ning Wunpawng Mungdan Shanglawt Hpyendap (KIA) kaw nna ga garan nhtawm Myen asuya de laknak jahkrat shang mat ai, Du kaba Mahtu Naw woi ningbaw ai, Kachin Defense Army gaw 2010 ning hta Kawnghka Pyitusit ngu mying galai wa ai wuhpung rai nga ai.

Myen hpyendap gaw KDA hpe jahtawn kau nhtawm sinat lau 10 hte Kawnghka Pyitusit hpe bai ninghtan na matu mung galaw nga ai lam chye lu ai.

Ya ten, KDA hta tara shang n-gun 3,000 daram raitim tara n shang jahpan gaw 10,000 hkawt rai na lam maram tawn ai re. Miwa amyusha ni law law mung KDA lahta tsang madang kaw nna lawu tsang du hkra shanglawm nga ai lam chye lu ai.