Tag Archives: #Coronavirus

Shiga

Myen COVID-19 machyi masha 5 jat, makawp ninghkap ladaw bai jat

Leave a comment

Bat Langai Ya, July 13, hta COVID-19 machyi masha shagrin lu ai marai 5 jat wa nna, Myen asuya gaw ana zinli makawp ninghkap ladaw hpe July 15 kaw nna July 31 de, bai jat dat sai re.

Ndai machyi masha n’nan 5 hta 3 gaw la hte 2 gaw num rai nna, ya ten shanhte yawng Yangon We-ba-gyi mungshawa tsirung rawng nga ai re.

Hkamja hte Ginsup Hkringmang Dap a Langai Ya shana hkying 8pm ndau hte maren, Coronavirus ana mu jep masha yawng 336, bai mai tsai ai 261 rai nna si ai gaw marai 6 nan nan re.

Jinghpaw mungdaw hta machyi masha jat wa ai lam n nga ai.

Mungkan ting hta COVID-19 ana zinli kap bra lam lung nga dingyang rai nna, shagrin lu ai machyi masha sen 130 jan, si ai sen 5 mun jan rai nhtawm, sawng dik U.S. hta machyi masha sen 34 jan rai nna si ai gaw 137,800 jan du nga sai hpe, Myen mung aten July 13, shana hkying 9:30pm du hkra na Worldometer jahpan hta mu lu ai.

Myen a htingbu, mungkan e nambat masum ana kap bra dik htum, Gala mung e machyi masha jahpan 889,000 jan hte si ai gaw 23,300 jan sai re.

Shiga

Tara shang WHO na pru na matu U.S. Trump asuya galaw hpang

Leave a comment

U.S. Trump asuya gaw Mungkan Wunpawng Hkamja Dap, WHO, kaw nna tara shang pru na galaw hpang dat ai ndai lam gaw, Amerika e coronavirus machyi masha rawt lung nga dingyang ten lahkam dat ai mung rai nga ai.

Lahta Rapdaw Maigan Kyit Hkai Komiti malawm, Democrat pati lahta tsang salang, Robert Menendez a Twitter kaw July 7, bat Lahkawng Ya shani, shiga shana ai re.

Ya na zawn, Trump a COVID-19 mabyin masa hta matai htang hku nna WHO kaw nna U.S. pru ai majaw Amerikan ni a asak hte akyu ara ni n lu makawp ai sha, Amerikan ni machyi jawng ai hte
Amerika hkrai shingtai byin taw na re nga, shi a shiga hta ka tawn ai re.

July 4, U.S. Shanglawt Nhtoi hta Gumsan Magam Trump gaw COVID-19 ana zinli hpe “Chinese pandemic” ngu nna kahtap tsun wa sai re.

Shawng e mung, “U.S. gaw WHO hpe alu law dik jaw tim, WHO gaw alu kachyi sha jaw ai Miwa maga n’gyeng tsap ai.”  Bai, “Teng sha nga yang, COVID-19  ana zinli gaw Miwa mung Wuhan kaw 2019, October shata kaw nna chyam bra nga sai raitim, kaga mungdan ni tau hkau sadi maja lu hkra WHO n lu galaw ai” hte, “WHO gaw Miwa a ka-up da hkrum ai”, ngu nna Trump dinglun wa sai re.

Tara shang pru ai lam, July 6, 2021 kaw nna rai na hpe Mungkan Wunpawng Hpung Amu Madu Daju de shiga shana tawn sai nga, U.S. Maigan Kyit Hkai Dap salang langai tsun shagrin ai re.

Shiga

Myen COVID-19 machyi masha mali bai jat, yawng 303 du

Leave a comment

COVID-19 ana mu jep masha mali bai jat sai majaw, Myen mung kaw ndai ana hte machyi masha yawng 303 du sai lam hpe asuya Hkamja hte Ginsup Hkringmang Dap, July 1, shana hkying 8pm, ndau hta tang madun ai.

Ana mu jep ai masha mali tup, maigan kaw na du wa ai rai nna, shanhte hta marai lahkawng gaw England hte ngam ai yan gaw UAE na du wa ai rai nna, ya ten shanhte yawng hpe Yangon, Dingda Uk-kala-pa tsirung kaw tawn da ai lam, ndau hta tsun ai.

Ya ten du hkra, Myen mung tinang COVID-19 ana byin shangun ai Coronavirus a majaw si ai gaw marai (6) n jat ai hte, bai mai tsai wa ai gaw 222 re.

Jinghpaw mungdaw shara lahkawng kaw COVID-19 ana mu jep masha 2 nga ai kaw, langai gaw Mungnyang (Munyin) hte bai langai gaw N’mawk kaw re.  Yangon na du wa ai Mungnyang machyi masha wa bai mai tsai sai majaw, ya ten Manmaw tsirung kaw tsi lajang nga ai gaw, Loije Myen-Miwa ga jarit shagyit kaw lit ang ai, N’mawk na hkamja dap magam gun saranum re.

Myen mung a htingbu Gala mung hta, lani mi ana mu jep masha 18,000 lahta hte mungkan a no.4 law dik, ana kap bra nga ai masha yawng sen 6 jan rai sai hte si ai jahpan 17,000 jan nga sai re.

Mungkan ting COVID-19 ana kap bra ai shadang, lani mi marai sen lahkawng hkawt hte, tsaw lung nga dingyang rai nna, Myen mung ten, July 1, shana 11pm du hkra, ana mu jep masha sen 100 jan hte si ai sen 5 jan du nga sai.

Shiga

Miwa jarit KIO COVID-19 Shagyit hpe Myen hpyen ni sa hpya kau

Leave a comment

Jinghpaw mungdaw sinpraw, Myen-Miwa ga jarit pru-shang lam, KIO COVID-19 ana jep shagyit hpe, Loije Myen asuya dap gaw June 22, bat Langai Ya shani, hpyen hpung hte sa zing hpya jahten kau ya sai re.

Ndai shagyit hta, KIO hkamja dap magam gun ni hte mungmasha tsi magam gun ni nga nna, lai hprang pru-shang masha ni hpe COVID-19, Coronavirus ana kap n kap tsi jep ya ai lam hpe, lai wa sai March shata daram kaw nna galaw nga ai rai nga ai.

“Nang, Loije hte Lana Zup lapran kaw Miwa mung hku nna, nang Nba Pa maga de rap ai lam langai na hka mahkrai gate (shagyit) kaw re. Hkamja dap masha ni dai kaw sa nga ri nga ai. Re yang she, daini (June 22) gaw, nang Loije kaw na Myen ni sa na sa dawm kau, yawng sa run kabai kau ya ma ai,” nga nna shimlam tsang ra ai majaw mying n tsun mayu ai ginra masha langai tsun ai.

Myen mung aten, jahpawt daw hkying 9:30am daram hta Myen hpyen ni ya na zawn galaw nna dai shagyit kaw shana maga du hkra wa nga ai ten, Nba Pa de na lung wa ai KIA Dung (1) hpyen hpung du na mahka bai htingnut ya ai re.

“Myen ni, hpyen hpung hku sa nna sa jahten kau ya ai majaw, htaw KIA Dung (1) na hpyenla ni mung, marai manga kru shi daram lung wa, shana daw de, dai kaw Myen ni gaw shani ting wa nga kau da na htaw ra (Dung 1) ni du n du rai ten hta, bai wa mat ai da”, nga nna lahta na salang wa tsun ai.

Dai shani ganoi ganoi gap hkat wa ai hpang, matut nna hpyen masa jahta hkat ai masa naw re lam sagawn chye lu ai.

Ndai June hta praw kaw nna, Lahta Sammung, Muse hte Kutkai ginwang lahkawng kata KIA dap daju ni hpe Myen hpyen ni sa htim gasat ai lam ni, ndai bat du hkra, galaw nga ai re.

Mungdan kata COVID-19 ana zinli makawp ninghkap lamang galaw nga ai ladaw, May (10) kaw nna August (31) du hkra, jahten sharun hpung ngu masat ai, Rahkai AA hte byin ai majan hta lai, ngam ai rawt malan ginra ma hkra gaw, majan jahkring ai nga nna tatmadaw Myen hpyendap gaw May (9) ya shani ndau sai re.

Myen hpyendap maga, Lahta Sammung e “ginra jasan” galaw ai shaloi KIA hte hkrum katut gap hkat hkat re ai masa she re nga, tsun timung, teng sha gaw masing nga nga hte “htim gasat majan” galaw wa ai re nga nna, Laiza KIO Shiga Magam Dap lithkam Du Kaba Nhpang Naw Bu tsun ai re.

Shiga

Brazil Covid-19 kap bra masha sen 10 du

Leave a comment

Myen mung aten, June 20, jahpawt hkying 6am du hkra, Dingda Amerika, Brazil mungdan hta Covid-19 ana mu jep masha 1,038,568 du sai majaw, kade n na ten U.S. hpe lai nhtawm ana zinli sawng dik rai wa chye ai lam, chyoi chye ai ni tsun nga sai re.

Si ai jahpan gaw 49,090 rai nna machyi masha jahpan tsaw lung nga dingyang hte daini lani mi hta jat wa ai machyi masha ni’nan 55,209 nga ai hpe Worldometers website hta mu lu ai.

Mungkan ting Coronavirus kap bra ai lam tsaw lung nga ten, “mungkan gaw tsang ra ai byin yan madang ningnan kaw du nga sai” nga nna June 19, bat Manga Ya shani, Mungkan Hkamja Dap, WHO, sadi jaw wa sai re.

Brazil gaw mungkan hta No.2 ana kap masha law dik rai nga ten, shi a ntsa dingdung Amerika U.S. kaw machyi masha yawng 2,295,356 hte si ai yawng 121,391 hte, na du dik htum re.

Mungkan hta No.4 ana kap bra dik htum, Myen mung htingbu Gala mungdan hta, ana kap ai hte si ai jahpan tsaw nga dingyang rai nna, ya ten du hkra, ana mu jep masha 395,812 rai nna si ai gaw 12,970 du nga sai.

Hkamja hte Ginsup Hkringmang Dap a June 19, jahpawt hkying 8am ndau hte maren, Myen mung hta ana mu jep masha n’nan 23 bai jat wa ai majaw machyi masha jahpan yawng 286 du nna bai mai tsai wa ai 192 hte si ai gaw marai 6 nan nan sha re.

Shiga

COVID-19 machyi masha yan hte hkrum katut ai J.M. masha (9) hpe san san tawn

Leave a comment

Mungkan kap bra ana zinli kaba, COVID-19 machyi masha lahkawng hte san san hkrum katut ai Jinghpaw Mungdaw masha yawng (9) hpe shinggan n pru na pat hkrum yu sin tawn ai lam, chye lu ai.

Machyi masha masat (245), la, asak (30) ning, hte hkrum katut ai Myitkyina, Shatapru na masha (8) hpe dum nta n pru na hkum pat tawn nna Machyi masha masat (249), asuya tsi sara num, askak (24) ning, hte hkrum katut ai marai (1) hpe gaw Myitkyina tsirung kaba san da ai shara (quarantine center) kaw tawn da ai re.

Ndai machyi masha lahkawng, Masat (245) hta June 9, hte Masat (249) hta June 11, ya ni hta ana jep shapraw lu ai rai nna shan gaw maigan n pru ga yu ai lam, mungdan asuya Hkamja hte Ginsup Hkringmang Dap ndau ai re.

Masat (245) gaw Sammung Dingda, Si Sai mare na rai nna ya ten Tawnggyi asuya tsirung langai kaw rawng nga ai re. Shi Myitkyina lahta Tayang Zup kaw amu galaw nga ai kaw nna dum nta n wa shi yang, May (19) hta Shatapru Mawng Tai Kah Workshop amu galaw masha (5) hte de makau Let Ya lusha seng na masha (3) hte hkrum katut wa sai lam, Jinghpaw Mungdaw asuya Covid-19 makawp ninghkap komiti na Ningtau Ningbaw U Tin Lai tsun ai re.

Bai, Masat (249) hte hkrum katut ai, asak 40, Manmaw asuya lahta tsang jawng na sara num, gaw Myitkyina Dakkasu jawng de laika jep na matu June praw 3 kaw nna du taw nga ai ten, shi hpe Myitkyina tsirung kaba COVID-19 masam maram dabang de June 11 ya shani sa ap tawn ai nga, dakkasu jawng-up Dr. Aung Win tsun ai re.

Mungdan ting madang, bat Mali Ya lani mi kaw sha, Coronavirus machyi masha n’nan marai 11 (Maigan na du wa ai, Bangladesh na 1, Gala na 10) jat wa ai majaw, ana byin ai masha yawng 260 du wa sai hte, shanhte hta bai mai tsai wa ai gaw 165 rai nna si ai gaw marai (6) nan nan re lam, asuya Hkamja hte Ginsup Hkringmang Dap a June 11, shana hkying 8, ndau hta tang madun ai.

Mungkan madang hta gaw, June 11 du hkra, COVID -19 ana kap bra shadang gaw lani mi marai 100,000 jan hte tsaw jat nga dingyang rai nhtawm lani mi si ai jahpan chyawm gaw 3,000 hte 6,000 lapran hte hkrat yawm wa ai hpe, Worldometers sawk sagawn jahpan hta mu lu ai.

U.S. gaw mungkan e ana kap ai hte si jahpan law dik rai nna ya ten machyi masha wan 2 jan hte si ai gaw sen mi jan sai re. Myen mung a htingbu Gala mungdan hta, ya ten masha sen masum hkawt kaw ana kap bra nga nna si ai gaw hkying matsat jan hte, mungdan e ana kap ai shadang nambat 4 tsaw dik de gumhtawn lung nga sai re.

Shiga

COVID-19: Maigan na nhtang wa ai ni Myitkyina de matut du

Leave a comment

COVID-19 mungkan kap bra ana zinli a majaw mungdan asuya hkrunlam lajang ya ai npu maigan mungdan na nhtang wa ai Jinghpaw mungdaw masha ni Myitkyina de du shang nga dingyang re.

June praw 7 hta Htai mungdan kaw na Gawrahka amyusha ni law malawng Myitkyina de du shang wa ai re. Ya ten du hkra, Htai kaw nna Myitkyina de mawdaw hte du wa ai masha yawng 615 du sai nnga shanhte hpe hkap la na mungdaw asuya masat tawn ai Shatapru mawdaw kaba daru kaw ana zinli makawp maga lam bungli hta ap nawng dawjau nga ai, Kachin State Covid-19 Prevention Network (KsC19PN) na Shayi Seng Nu Pan tsun ai re.

Lai wa sai shata lahkawng jan kaw nna Shatapru mawdaw daru hta maigan na shang wa ai mungdan masha yawng 2,000 daram rai sai lam chye lu ai.

Mungdan Asuya Hkamja hte Ginsup Hkringmang Dap a June praw 8, Bat Langai Ya, hkying 8 sumtang hte maren, Myen mung kaw coronavirus ana kap ai masha 1 bai kahtap jep shapraw lu ai majaw ya ten ana mu jep masha yawng 244 rai nna si gaw marai 6 nan nan naw re.

Asuya tara shang jahpan hte maren, Jinghpaw mungdaw e gaw langai sha nga ai ana kap ai masha shi bai mai tsai wa ai hpang kahtap byin ai masha kaga mi n nga shi ai re.

Ya ten mungkan ting hta, Myen mung ten June 8, shana hkying 11:43 ten du hkra, Covid-19 a majaw si ai masha yawng sen 4 jan sai hte ana mu jep masha yawng wan 7 jan rai nna ana chyam bra ai shadang tsaw nga dingyang the lani mi ana jep shapraw lu ai masha gaw sen mi lahta byin nga ai re.

Sawng dik U.S. kaw ana mu jep masha wan 2 jan, si ai sen mi jan hte bai mai tsai wa ai gaw sen 7 jan re. Bai nna, Brazil, Rasha, Gala mungdan ni hta ana mu jep masha tsaw nga dingyang rai nhtawm UK hte Italy kaw mung dingyang naw ana kap bra nga ai re.

Shiga

Brazil COVID-19 kap bra madang mungkan No.2 de du wa

Leave a comment

Myen mung ten, May 24, jahpawt hkying 6:42am du hkra, Dingda Amerika, Brazil mungdan gaw Covid-19 ana mu jep masha yawng 347,398 hte, shi a ntsa Rasha hpe lai nna, ya mungkan e nambat lahkawng law dik kaw du nga sai hpe Worlddometer hta mu lu ai.

Brazil kaw si ai masha 22,013 rai nna Rasha e gaw ana jep shapraw lu ai masha yawng 335,882 rai nna si ai gaw 3,388 re.

Ana zinli law dik byin nga ai Dingdung Amerika, U.S. kaw ana mu jep masha yawng 1,666,801 rai nna si ai gaw 98,683 du sai re.

Mungkan ting Coronavirus a majaw Covid-19 ana kumla mu jep ai masha yawng 5,397,857 rai nna si ai jahpan gaw 343,608 du nga sai re.

Dai hta, Myen mung e May 23, shana hkying 8pm du hkra, ana mu jep masha yawng 201 rai nhtawm si ai gaw marai 6 re lam, asuya Hkamja hte Ginsup Hkringmang Dap ndau ai re.

Shiga

Mungkan COVID-19: Langai Ya shani si ai 3,000 jan

Leave a comment

May 18, Amerika nhtoi, bat Langai Ya lani mi, Covid-19 kap bra ana hte mungkan ting si ai masha yawng 3,414 rai sai hpe Myen mung May 19, jahpawt hkying 7 am ten na Worldometer jahpan hte maren chye lu ai.

Ya ten du hkra, mungkan ting Coronavirus a majaw byin ai Covid-19 ana mu jep masha yawng 4,887,929 hta si ai 319,961 rai nna, bat Langai Ya lani mi hta jat wa ai machyi masha n’nan yawng 88,663 re ai hpe Worldometer jahpan hta mu lu ai.

Mungkan e ana laja dik byin ai U.S. hta bat Langai Ya shani du hkra machyi masha 1,550,105 hte si ai 91,977 re. Bat Langai Ya shani jat wa ai machyi masha 22,441 rai nna si ai gaw 999 re.

May 19, shana hkying 8pm, Myen asuya Hkamja hte Ginsup Hkringmang Dap ndau hta Covid-19 ana kap ai masha langai bai jep shapraw lu ai majaw tara shang shagrin lu ai machyi masha yawng 188 du sai lam tsun ai.

Jinghpaw mungdaw de gaw, asuya tara shang jahpan hte maren, May 11 hpang ana kap ai masha laga mi n nga ai re.

Shiga

Mungkan Covid-19 si jahpan 300,000 jan sai

Leave a comment

Mungkan Covid-19 ana zinli hte si ai masha jahpan, ya 300,000 jan sai lam hpe Amerikan Johns Hopkins Dakkasu a sawk sagawn shiga hta tang madun ai.

May 14 (Myen mung ten May 15, manap hkying 4: 58am) du hkra lu hta gahkyin ai jahpan hte maren mungkan ting Covid-19 Coronavirus ana mu jep masha 4,426,937 (Myen mung ten May 15 manap 4:36) hta si ai 301,370 du sai lam, sawk madun ai.

Ndai jahpan gaw mungdan 188 asuya ni jaw ai report kaw mahta ai rai nhtawm, kaja wa byin ai jahpan gaw dai hta grau tsaw na masa nga ai lam sawn da ai re.

Mungdan asuya law law gaw masha n pru hkawm na lockdown tara jahkrat tawn ai hpe bai dawm magang na ten U.S. hte UK gaw ana kap bra nga ai lam hpe bunghkup lu hkra shakut nga ai re.

Myen mung e machyi masha 181 hta na si ai 6 re lam, May 14 asuya Hkamja Dap hte Ginsup Hkringmang Dap ndau ai re.

Jinghpaw mungdaw kaw langai sha nga ai machyi masha No. 144 gaw bai hkam kaja wa ai majaw Myitkyina tsirung kaw na May 11 hta pru na ahkang jaw ai re.  Dai re majaw, asuya a jahpan sumtang hte maren ya ten Jinghpaw mungdaw e Covid-19 ana kap ai masha n nga sai re.