Putao ginra hta, asak kaba sai Pyithutsit hpyela dingsa ni hpe n ta kata du hkra bai hkan rim taw nga ai lam ginra masha ni tsun ai re.
Dang Gu Tang woi awn ai Putao Pyithutsit hpyen hpung ni gaw lai wa sai October htum maga kaw na, Pyithutsit hpyen pru ni hpe bai shaga taw ai rai nna, shaga na n sa ai ni hpe n ta di di hkan woi rim ai lam ni galaw nga ai rai nga ai.
“Shawoi Pyithutsit galaw nna hkring mat ai ni hpe bai shaga taw ai, Mying jahpan kalang lawm ga sai ni yawng hpe galoi gara shani du ngu nna, laika hte shawng shaga ai, laika hte shaga na lahkawng masum ya la yu na n sa wa jang nta di di hkan shaga woi ai, n ta kata du hkra shang woi ai,” nga tsun ai.
Dai zawn shaga na n sa jang, du nga ai shara kaw nan hkan sagawn na rim woi ai, n hkan jang adup abyen ai lam ni galaw ai lam hpe matut chye lu ai.
Hpyenla dingsa ni hpe hkan rim lahkawn na matu, dum nta lusha seng hkan du hkra, hkan lagyim yu nna, rim woi ai lam matut chye lu ai.
Pyithutsit maga ya na zawn, laja lana hpyen rim lahkawn ai majaw, ginra mung shawa ni galaw lu galaw sha, hkawm sa hkawm wa lam ni hta mayak byin hkrum taw nga ai re.
