Myitkyina Muklum kata, lai wa sai shata mi laman hta madu n mu ai moi mang 3 hpe mu hta ai lam, garum kahtau hpung ni kaw na chye lu ai.
Lai wa sai shata kaw mu hkrup ai moi mang ni hpe maram yu yang, shawoi shata hkan na hta grau law wa ai hpe mu lu ai lam matut tsun tawn ai re.
Ya na zawn madu n mu ai moi mang law wa ai gaw, dum n ta n lu wam wam dam dam rai tam lu tam sha hkawm ai masha ni law wa ai zawn, Kani Nanghpam lusha nna, tinang hkrai chye ai hku tam lagu sha ai lam ni a majaw re lam garum kahtau hpung na lit nga ai Salang langai KNG de n dai zawn tsun tawn ai re.
“Ndai zawn re law wa ai ngu gaw, yak hkak ai majaw tam lu tam sha hkawm re kaw na n ta de matut mahkai n galaw mat ai ni nga ai zawn, Kani Nanghpam lusha a majaw n ta na pru mat wa ai ni rai na re ngu mu mada ai,” nga tsun ai re.
Ya na zawn madu n pru ai moi mang ni hpe mu hkrup ai shara law malawng gaw, Mali hka kau hte lam makau na nam sumwum zawn re shara ni kaw law malawng mu ai lam tsun tawn ai re.
Ya na zawn madu n pru ai moi mang law malawng gaw, asak ram ai 20 hte 40 lapran na La wa ngan ni law malawng re lam mu madu lu nga ai re.
Jinghpaw mung kata lani hte lani tam lu tam sha grau grau yak wa ai ten, Kani nang hpam dut mari ai lam hte, hpai da wang ni grau grau law jat wa ai hpe mung mu mada lu nga ai re.
