Manmaw shawng lam hpyen man hta dai hpawt manap kaw na majan laja lana bai gasat hkat taw nga ai lam chye lu ai.
July 30 ya jahpawt hkying 9 aten daram kaw na, Manmaw ginra hta KIA pawng hpawm hpyen hpung ni nga ai de Myen ni htu gasat wa ai majaw majan byin wa ai lam re nga, shawng lam hpyen magam gun langai KNG shiga de tsun ai re.
“Ndai laman Myen ni anhte nga ai maga bai htu wa ai majaw majan bai byin wa ai ga rai nga ai, shawoi hkan gaw laknak kaba gap shapyen hkat drone bawm jahkrat bun hkat re ram sha re, dai hpawt gaw shan hte lagaw lam hku htu lung wa ai majaw gasat poi bai byin wa ai ga rai nga ai.” Nga tsun ai.
Myen hpyen dap kawn, KIA pawng hpawm hpyen hpung ni shara la nga ai de hpyen shamu shamawt htu shadut wa ai majaw, gasat gala majan byin wa ai rai nna, lahkawng maga hpyen masa shaja hkat nga ding yang re ai lam chye lu ai.
Manmaw ginra hta KIA pawng hpawm hpyen hpung ni hte Myen hpyen dap ni laiwa sai 2024 ning December praw 4 ya shani kawn gasat gala majan byin wa ai gaw, ya aten laning mi jan sai rai nna, KIA pawng hpawm hpyen hpung ni dap shara law malawng hpe gasat zing da lu ai re.
Ya aten Myen hpyen dap ni gaw Manmaw, Shwegu, Hpakant hte Hkawng Lang Hpu ginra ni de hpyen n-gun, laknak arung arai htaw sa jat bang ai lam galaw nga ai sha n-ga, hpyen shamu shamawt htu shadut ai lam mung ding yang galaw nga ai majaw, Majan shani shagu ngu na ram byin taw ai lam chye lu ai.
