Myen Hpyen Hka Sanghpaw Bai Lung Wa Taw Ai Majaw Mung Shawa Ni Myit Tsang Nga
Mandalay Gawwun Hka Sanghpaw daru kaw na, Hpyen Gasat ai kaw lang ai, Hpyen Sanghpaw lahkawng Jinghpaw mung maga de man yawng lung wa taw sai rai nna, matut nna mung Sanghpaw 20 daram Jinghpaw mung de lung wa na na matu hkyen shajin taw nga ai lam Rawt malan hpung ni kaw na chye lu ai re.
Dai sanghpawli lahkawng gaw, panglai hka n tsa gasat hkat ai kaw lang ai hpyen sanghpawli hpan rai nna, shawng de lam jasan hku na shim lam la y ana matu lung wa ai hka sanghpaw li re lam Sagaing rawt malan hpung maga tsun da ai re.
Myen Hpyen Hka Sanghpawli lung wa ai ten, mali hka lam mayan hpe Myen hpyen nbungli bawm sharut bun lai wa yu ai masa lam the seng nna, Mali hka kau kaw nga ai Salang langai KNG shiga dap de n dai zawn tsun dan ai re.
“Anhte hka kau mayan kaw nga ai ni gaw, shaning shagu yen ai, ya dai ning the rai yang mali ning du sai. Anhte yawng chye ai hte maren, hpyen sanghpaw hpe shim lam la ya ai nga nna, gang hkau n tsa hku, nbungli hpan hkum pyen nna, Mare yawng mayawng kaw nbungli bawm majoi she sharu bun ma ai mi.Maning moi ni nbungli gap sharu bun na hten za ai dum n ta ni pyi hpa rai n lu galaw ai, ya kalang bai yen ra sai ga rai nga ai.” Nga tsun ai re.
Myen Hpyen Hka Sanghpawli Shwegu du sai lam shiga du ai the Mya Lay, Sin Hkan mare hkan na mung shawa ni gaw, tinang man ang ai shara, Buga hpung hku matsun ai shara ni de hprawng yen ai lam matut tsun dan ai re.
Myen Hpyen Sanghpaw lung wa ai ten, gang hkau n tsa hku Nbungli hpan hkum the shim lam la ya nna, shan the n tsen n hten ai shara hkan nbungli bawm hkrup mara jahkrat bun ai majaw, Mung shawa dum n ta law law hten za hkrum lai wa sai re.
Hpyen Sanghpawli lung wa ai ten na Nbungli kaw na, bawm, jak sinat gap sharu bun ai lam the seng nna, ginra masha wa n dai zawn matut tsun da ai re.
“Ya Madung gaw Y12 Nbungli kaw na rai nga ai. Y12 Nbungli kaw na bawm jahkrat bun ai ngu gaw Bainam hkyi ru hpa she re mi, ngut na gaw Helicopter na Jak sinat bai gap bun, ya anhte mung shawa ni madung grau na yen ra ai gaw Y12 rai nga ai.” Nga matut tsun ai re.
Lai wa sai June 27 ya shani Mandalay kaw na Hpyen Sanghpawli lahkawng lung wa taw sai rai nna, ya matut nna mung, Sanghpawli 20 matut lung wa na lam nga ai hpe rawt malan hpung maga na tsun da ai re.
Lai was ai shaning hta mung, Lawu ga de na Sanghpaw 10 jan Manmaw de lung wa nna, KIA hte PDF pawng hpawm ni gasat zing da ai shara law malawng hpe bai tat sum kau ra mat ai rai nga ai.
Ya dai ning mung, Myen Hpyen Hkasanghpawli Manmaw de bai du lung lu mat ai rai yang, shalawt da sai ginra ni hpe bai tat sum wa mai ai lam hpyen masa yu maram ai ni tsun da ai re.
