Warazup Hpyen Yen Mung shawa ni tinang mare buga dum n ta de bai n htang wa nna, wunli sharawt akyu hpyi ai lamang hpe April praw 8 ya shani galaw la ngut ai hpang, tinang dum n ta wang tinang mai byin ai hku na wa htawt nga taw sai lam, ginra masha langai tsun dan ai kaw na chye lu ai.
Warazup Hpyen yen mung shawa ni gaw, lai wa sai 2025 ning February 17 ya shani Mare ka-ang nbungli bawm wa jahkrat bun ai majaw, Mare masha ni tinang man ang ai shara ni de hprawng yen ma ai rai nga ai.
Warazup mare masha ni Hpyen yen mayak lam hte seng nna, n dai zawn tsun dan wa ai re.
“Hpyen yen ladaw laman na mayak gaw, Tsi mawan, Malu Masha rai nga ai, Nnan hprawng wa ai shaloi gadai mung gadai hprawng ai re majaw Plastic ginsum pyi n lu gap rawng ai rai nga ai, shara lahkawng masum htawt hprawng ra ai zawn re ni, hkrun lam n hkrang mat ai zawn re mayak lam ni rai nga ai,” nga tsun dan ai re.
Warazup mare gaw, ya yang hpyen majan mung n nga, mare buga kaw yi sun ni a tsawm sha mai galaw sha sai majaw gaw, tinang dum n ta lamu ga ni hpe wa yu sin let, n htang wa ai re lam chye lu ai.
Wara Zup mare gaw, n-ta htinggaw 380 nga ai hta na htinggaw 260 mare buga de n htang wa sai lam chye lu ai.
Hpyen yen ni mare buga de bai n htang wa ai rai tim, dum nta law malawng hten za ma sai majaw, mare dum n ta bai gaw sharawt ai hta madung garum ya na hpe ra sharawng ai lam, Wara Zup mare na Kawa la langai n dai zawn tsun ai re.
“Warazup Hpyen yen dabang ngu tara shang hpaw da ai gaw n nga ai, dai majaw ya anhte Warazup mare hpe gaw, ya bai wa sai re majaw gaw, yawng hpe hpyi lajin mayu ai gaw gawgap lam de madung tawn na garum la nah pe hpyi shawn dat mayu ai,” nga tsun ai re.
Warazup mare de ginra masha ni bai n htang wa ai ten, dum n ta law malawng masha n nga na hten ma sai majaw, Mung Shawa ni yawng kaw na mung, mare buga bai gawgap na matu jawm garum madi shadaw la na hpe Warazup ginra masha wa n dai zawn matut tsun hpyi shawn da ai re.
Wara Zup hpyen yen mung shawa ni gaw, Nam de laning mi jan hprawng yen hkawm ai hpang, ya mare buga de bai n htang wa ai Hugawng Lido lam kaba n tsa na mare kahtawng langai mung rai nga ai.
